●◦● ~ [ليــــت اللي باقـــي من عُمــري ويـــاك]~●◦●

the newst update

ردوا الروايه المنتدى مع الإعتذار حقي ;$~

update

الرواية راح تلقونها بس بالبلوق

,إنحذفت من المنتدى اللي كنت كاتبه فيه

"يقولون" تخالف الشرع ;pP~

فـــ بس بالبلوق بتحصلون ...ليت اللي باقي من عمري وياك .....

●◦● الجزء السادس ●◦●
روان مرتبكه بشوفة جاسم تطالعه و ميته من الخرعه اللي ملامحها تبين انها مسويه شي !
جاسم بدون اي تفاهم راااح لي عندهااا و مسكها من شعرهااا : منووووو عزيز منووو؟!!
روان منصدمه من أخوهااا عمره ما مد إيده ! طاحت بالقاع تبجي .. و جاسم يطقهاا طراقاات .. جاسم يطالع خالد يشوفه قاعد يطالع رواان و معصب!
جاسم صرااااخ : خلووود شايف شي على إختي؟!! ...
رواااان تبجي بحرقهه و تطالع خالد بنظراات ترجي ....

خالد يبي يقول حق جاسم كل اللي يعرفه يبي يقوله اختك خانت ثقتكم! إختك خانت حبي لهـا ! إختك اللي احبها و اموت عليها تحب غيري !
خالد : صل على نبي جاسم شفيك ! هدد إختك
جاسم و يطق روان : واللي سمعته شنو!!!
خالد و يوخر روان عن جاسم: روان يا جاسم بنت خالتي اللي يمسها يمسني ! لا تظن بشوف عليها غلط و أسكت! إختك أشرف من الشرف !
جاسم و يحاول يهدي بس اللي سمعه غير بعصبيـــه : روووينه مننو عزيز ؟!!!!
خالد : يا جاسم طول بالك كل شي بالهدوء ينحل !
جاسم و يدزز روان من إيده و يقعد على القنفه يحاول يلقط أنفاسه .. فج زرارات دشداشته:
سمعتك تقولها سليمان و عزيز و البقية تأتي !!!
خالد يطالع روان بنظره ما فهمت معناها: دكاترتها بالجامعه ! توها قاعده تقولي السالفه ! مشتكيه على دكتور سليمان عند دكتور عزيز و دكتور سليمان سمعها !

جاسم مو فاهم شي! و حس انه ظلم إخته.. .... سكت ما علق على ولا كلمه
روان تصيــــح تزيد بالبجي تشاهق بأعلى صوتها ليش يا خالد ما قتله و خليته يذبحني و يفكني من هالدنيــا!! ما ابي اكون معلقه برحمتك!!!.. لي متى أنته اللي بتنقذني !. قامت ركض و طلعت من الدوانيه تشاهق!

جاسم و حاس بتأنيب الضمير: لاحوله ولا قوته إلا بالله ...
خالد و يمسك جاسم من جتففه: شفيك يا خوي عمرك ما مديت إيديك على إختك ولا فكرت تشك فيها! مو أهيا اللي كانت تربيتك قبل ما تكون تربية الوالده الله يرحمها!

جاسم و يحط إيده على راسه مو مصدق اللي سواه: والله يا خالدد من السم اللي اسمعه من حصه! حطت إبالي افكار عمري ما فكرت فيها!

خالد و يهدي جاسم: ما عليه جاسم إنته هد نفسك و خلها إهيا تهدي و قولهاا هالحجي و صدقني ماكو إلا الخير .. روان تحبك و تحترمك وايد ... ماراح تشيل بقلبها
جاسم بضيقه : إنشالله , والله يا خالد مادري شياني اللي شفتها تبجي خلتني أشك أكثر !....

خالد و الدنيا مو شايلته من الهم .. كان ياي يكلم بوجاسم إنه يبي يخطب روان خصوصا عقب ما شافها مع عزيز , بس الوضع ما يسمح نهائيـاً: .. جاسم انا استأذن الحين مستعيل عندي جم شغله بخلصهم!

جاسم بخجل من تصرفه : اسف يا خوي عطلتك .. إلا تعال شعندك ياينه الدوانيه مو من عوايدك ؟!
خالد: ماكو مريت اسلم عل ابوك . اشوفه جان يبي اوديه بيتنا يقعد مع ابوي !
جاسم : أهاا , لا خلاص لا تتعطل عن اشغالك اذا يبي يروح أنا بوديه ...
خالد : يالا عيل فمالله ..
جاسم : فمان الكريم ...

طلع خالد و هموم الدنيا كلها فوق راسه ... منزل راسه بالقاع , و دموعه تارسه عينه!
ليش دافعت عنها جان خليت جاسم يطقها و يبرد جبدك فيها !.. جان خليته يستعيل بزواجك منها .... اأأأأأخخخ على هالقلب اللي مو قادر يقسى عليج يا روان !

مجروح قلبي و خاطري مجروح]
كيف الجسد ينسى حنان الروح
أحبهـــا
[و مدري شلي بقلبهـا


طلع خالد من بيت بوجاسم حزين . مو عارف شفيه ! حُبه لروان لاعب فيه مو مخليه يفكر او يتخذ قرارته عدل !
قبل ما يركب سيارته رفع راسه يطالع دريشة روان
... شافها واقفه متسنده على الدريشه تطالعه و تبجي !
جسمها يرتعش من البجي!
أه يا روان لو تفهمين اللي فيني ! والله قلبي يتقطع كل ما شفت دمعه من عينج!
خالد ظل يطالعها ! لف ويهــا و ركب سيارته و رااااح .......



جاسم قاعد بالدوانيه متضايق من نفسه !
كاره روحه ليش يا جاسم مديت إيديك عليها ... هذي الرجوله يا جاسم ...
إختك ! بدال ما تكون أنته اللي تدافع عنها ضد اي كلمه تنقال عنها ! إنته اللي تتبلى عليهاا ....




دخل بوجاسم الدوانيه .. لقى جاسم قاعد بروحه ...
بوجاسم و يقعد : السلام عليكم .
جاسم بضيق : وعليكم السلام ...
بوجاسم: عسى ماشر يا وليدي؟!
جاسم و يحاول يبين حق ابوه انه ماكو شي: ماشر يبـا بس شوية ضغوطات من الدوام
بوجاسم: الدوام لله يا جاسم .. عمرك يخلص و الشغل ما يخلص ..
جاسم: شسوي يا يبـا كل شي على راسي..
بوجاسم: إخذلك إجازه سافر انته و حرمتك بروحكم
جاسم: لا يبا ماله داعي سفر انا كنت بسافر عشان ايبلك البنات يوم إنك مسافر
الحين إنته رديت بالسلامه ماله داعي السفر و الإجازه ...
بوجاسم: يا ولدي مرتك لها حق عليك! متى أخر مره طلعت معاها و إلا ونستها بهديه؟!
تراها من عمر خواتك ! شوفهم بنات صغار يطلعون و يرجعون ...و مرتك محكوره بهالبيت !... ونسها يا جاسم ترى الله بيسألك عنها يوم القيامه ...
جاسم و يفكر بكلام أبوه ! حصه انا متجاهلها تماما تزوجتها و ظلمتها: إنشالله يُبـا ...

بوجاسم و يطالع ساعته: وينه خالد!؟ ساره تقول يبيني بالدوانيه
جاسم : إيه كان هني و راح , كان مار يسلم عليك و بيشوفك إذا بتروح معاه بيت اهله
بوجاسم : لا وين أروح معاه ... بيمرني ولد عمك بعد شوي بيوديني الطبيب يشوف تقاريري ...
جاسم : ما قصر والله مشاري قام بالواجب و أكثر بعد ..
بوجاسم: إيه والله إنه خوش ريال قام فيني قومه بالسفر .....
....
بهالوقت دشت لين بنت جاسم الدوانيه تركض
ليـــن :بـــــاباااااااااا
جاسم ياخذها و يلمهاا حيل: عيون أبوج إنتي
لين: بابا متى نروح بحر
جاسم : اليمعه أوديج البحر حلوو؟!
لين: متى اليمعه؟!
جاسم: عقب باجر
لين تنزل من حضن ابوها و تروح حق يدها : بابا بيوديني بحر حررررره ... قامت تركض إطلعت من الدوانيه
بوجاسم : ههههه تحرنيي هالزبوطه ...الله يا إنها تذكرني بساره يوم إنها صغيره نفس الشطانه نفس الحلاة ....

جاسم مبتسم .. لين كل حياته , لين بنته اللي ما كان مخطط انه إيبـها , لين نعمة ربه اللي خلته يعيش حياته بهالصوره ! لين الأمل اللي خلته يحب حياته من عقب ما ماتت أمه !

يرن موبايل جاسم ....
جاسم و تغيرت نفسيته 180 درجه:هلااااا والله عاااش من سمع هالصوت
صلاح : عااشت ايامـــك يا بعد من قام و قعد
جاسم : شلونك بو صلوووح من وين طالع ؟!
صلاح : طالع من المصباح من وين طالع بعد.. المهم لا تكثر حجي شعندك الحين
جاسم: ما تيوز إنته ,, قاعد بالبيت تعال مرني الدوانيه
صلاح: لا يبااا انا داق اقولك فيك طلعة حداق عقب صلاة العشا؟!
جاسم: اي حداق واللي يعافيك باجر عندي دوام
صلاح:يا عمي بنردك إمبجر , والله طلعه ما تطوف كل الشبيبه الزقرتيه بيوون
جاسم و حاس يبي يغير جو و أكيد الطلعه معا صلاح غير : مادري بوصلوح ما ظنتي
بوجاسم و يسمع : جان يبونك تروح الحداق روح معاهم ! وسع صدرك من هالحركه
جاسم عقب كلام ابوه : خلااص صويلح زهب عدتك أنا بــيي طرق ثيابي ماني يايب شي
صلاح: يــب بنتك لين معاك يمكن ينقص من عندنا خثاق حطينا بنتك هههههه
جاسم : يحليلك بنتي ايبها معاكم تخرعون طفولتها
صلاح: يالله أبوي أنته خلني أدق على شباب الباجين بعد .. عقب صلاة العشا مارينك
تيكي؟!
جاسم: ههه إذا الله أحيانا
صلاح: يالله فمالله ياالشايب
جاسم: محد شايب غيرك , يالله فمان الكريم ....


سكر جاسم من صلاح! الله يا إنه يعز هالصبي أكثر من أخو بالنسبه له رفيجة من أيام الروضه ... فرقتهم دراستهم الجامعيه .. جاسم دخل هندسه و صلاح دخل الجيش !
بس بين فتره و فتره يلتقون .. وصج ينسى جاسم كل همومه مع هالإنسان يرد جاسمم الشاب الصغير اللي شطانة الدنيا كلها فيه ! جاسم اللي كانت الضحكه ما تفارق ويهه ......

بوجاسم و يشرب جاي: إلا متى بتروحون الحداق؟!
جاسم:عقب صلاة العشا إنشالله ...
بوجاسم : وسع صدرك يا وليدي ... تراك بعدك شباب لا تجفن روحك بهالشغل ..
جاسم : إنشالله يبــا ...
قام بوجاسم عقب ما سمع هرن سياره بره
بوجاسم: هذا أكيد مشاري , يالله عيل انا ماشي .. و أنته إستانس مع ربعك
جاسم بإبتسامة حنان لأبوه : إنشالله يبــا
بوجاسم توه بيطلع من الدوانيه , رجع و باس جاسم على راسه: والله يا وليدي إني راضي عليك دنيا و أخره ...
جاسم دمعت عينه أبوه يبوس راسه و راضي عنه شيبي من هالدنيـا ... قام من مكانه و باس راس ابوه : الله يخليك لي يا بوجاسم ...
بوجاسم يضحك : يلا انا اترخص ...
جاسم : مع السلامه .....


وقف جاسم بمكانه يفكر ... أنا كنت اشطن واحد بالعايله دايم مأذي أبوي .... كلا يدعيلي بالهدايه .... و اليوم راضي عني ..... إفرح يا جاسم الدنيا ليما الحينها بخير.... وايد اشياء تستحق إنك تضحك و تفرح عشانها ..
زوجه و بنت . و أبو راضي عنك شتبي أكثر ......
تذكر روان ... ضاق خلقه .. راضها يا جاسم إختك هذي مالها غيرك !
دخل جاسم البيت لقى ساره و لين قاعدين بالصاله و يتهاوشون بالمخاد ..
جاسم : يا الياهل هدي بنتيي ..
ساره و تطق لين حيل على راسها : هههه اهيا الباديه انا مالي شغل
لين تصارخ :باباااااا طقهاا معاي
ساره تكفخ لين بالمخده حيل تخليها تطيح بالقاااع: يحليلج جسوووم كنت اطقه لما كنت صغيره
لين و تقوم معصبــــه :بابااا مو جسوم إسمه !
جاسم و يضحك عليهم : انا جسوم يا التعبانه ... خذى المخده اللي يمه و حذفهاا عليهاا ساره و تروح عند لين و تشيلهاا: تبيني أحذفلك ياها الحين اعينهاا لك
لين تصارخ : عميمه مينووووونه
جاسم و يضحك : والله قمت اشك انج اكبر من ليونه نزلي بنتي لا بالعقال,
ساره و تسوي روحها خايفه تنزل لين : وي تطقني عشان هالبقه
لين تركض تلم ابوها: إيــــــــــي بابا يحبني ما يحبج
جاسم: ههه احبج و احب ساره بعد , وين روان؟!
ساره و تسوي حركات تحر لين: مادري والله ما شفتها من رديناا...

جاسم : أكيد بغرفتها .. شوفي بروحلها ان رجعت و شفتج تطقين الليدي لين بكوفنج
ساره : لا لا تحاتي روح إنته بس ...

صعد جاسم الدري و إلا يسمع صراخ لين : باااابااااا مينووووونه ساررروووه


جاسم يضحك على خبال إخته و بنته ... يحسهم أثنيتهم بناته ...


وصل عند غرفة روان ... حط راسه على باب روان يستجمع قوته .. يرتب افكاره شلون بيعتذر شنو بيقول ....
سمع صوتها تبجي ... تشاهق... بجي يقطع القلب ...
فتح الباب على طول ما نطر يستأذن ...
شافها بفراشها و ترجف من البجي ...
بس دخل لفت ويهها عليه
جاسم إنصدم من شكلها مو عارف شيسوي
رواان من دون اي تفكير ركضت لمت أخووها تبجي بصوت عالي !
جاسم يلمهاااا حيل : أسفف يا روان أســـف تنقطع إيدي إن مديتها عليج مره ثانيه !!!
روان و تبجي أكثر و جسمها كله يرجف بحضن أخوهاا
جاسم و بصوت مخنوق: سامحيني رواان والله أسف
روان و تطالع أخوها : مسموح يا بولين مسموح
جاسم و يقعد إخته على فراشها و يقعد يمها : مابي ولا دمعة تنزل من عينج! إخت جاسم الـ... دمعتها عزيزه ,
روان و تلم جاسم و أهيا تبجي : والله يا جاسم أنت مو اخوي و بس والله انك حسبة ابوي لي ! تطقني تذبحني بنتك أنــا ..
جاسم و يبوس أخته على راسهاا : تنقط إيدي إن إنمدت عليج مره ثانيه ...
روان تطالعه و تبتسمله : الله لا يحرمني منك
جاسم يلعب بشعرها حيل : مسحي دموعج ! دمرتي دشداشتي بسناسيلج
روان تضحك: اصلا ماكووو :$
جاسم يضحك : يا الله غسلي ويهج ونزلي قعدي تحت مع الميانين
روان : منو الميانين
جاسم: منو بعد بنتي و أختج
روان تبتسمله : إنشالله
.......

طلع جاسم من عند رواان و أهوه مرتااح ... الله يا روان الله على طيبتج و قلبج !



ريم عقب ما كلمت روان ... و تطمنت انه جاسم اعتذر منهااا ... نست هم رفيجتها و قعدت تفكر بمصيبتهااا ...
ريم و قاعده مع خواتها بالدار
ريم : أقولج متهاوشه مع امه لاعنه خير خيرها
فرح ( أصغر من ريم بسنه تدرس بمعهد الإتصالات و الملاحه): وانتي كله جذي جبريت اللهم يا كافي عسى محد قالج كلمه شبيتي عليه
ريم: الحين قولولي شسوي , باجر المره بتيــي... .
أسماء: تتوقعين أمج بتتذكرج؟!
ريم: ما صارلي سبوع من دعمتهاا , يعني اكيد ذاكرتني
فرح : هههه والله يا ريووم حضج فقر
ريم و زعلانه : يالله عااد , والله خايفه تكنسل كل شي !
اسماء: ريووووم عندي فكره
ريم: شنو ياام الأفكاار
اسماء: بس مو تقولين ما اسويه
ريم بقلة حيله: يبااا راضيه بأي شي ! المهم امه ما تهوون عني
فرح: ههههه استحي على ويهج كلش ماكو حيا ولا مستحى
ريم: شتبين يعني احبه اموت عليه , شنو تتوقعين اكيد ابي اتزوجه
فرح : امبيه لأ إختي فاسخه الحيا رسمي
ريم: سكتي سكتي انتي خل نسمع فكرة اسووم
اسماء: شوفي اول شي سيارتج ما تطلعينها من القارج عشان ما تشوفها امه
ريم: هذا طبعا شي اكيد
اسماء: و همممم شرايج باجر من الصبح تروحين الصالون تغيرين شكلج
ريم: هبله أنتي شغير بشكلي, بتعرفني بتعرفني
اسماء: مادري يعني صبغي شعرج , حطي اكستنشن ! حطي مكياج واايد
فرح:ايه والله مو تقولين انها عيوز خوو ما راح تجكج !
ريم: مادري اخاف تعرفني
اسماء: اهيا اكيد بتعرفج عقب بس انتي قصي عليها حاليا على ما تملجون ههههه
فرح: و إلا تدرين خليني انا اللي انزلهااا خو شعرفها فيج
ريم و تضحك على خبال خواتها: جب جب عشان تخطبج صج حقه اذبحج و أذبحهها وراج
اسماء: انتي ما تيوزين بس احترميهاا
ريم : ايه صج خالتي حبيبتي
فرح: اللي شرشحتيهاا هههههه
ريم و تفج باب الدار: براااااا انتي وياها مو كفو اشكيلكم همي
اسماء و قايمه بتطلع : هههه نشوف باجر منو اللي بتعطيج نفنوفها
ريم و تذكرت انها تبي تلبس نفنوف اسمااء: لأأأأأأأ حبيبتي انتي قعدي انا قصدي عن فرووح

فروح: لا والله هذا وانا كنت مستعده اضحي ببستريجي عشانج و عشان الأجلح مالج

ريم بخجل: اجلح ويهج برونزااااج هذاااا

[يحلمون اللي فيك يفكرون ياخذونك أنته مني والله لو يتجنون ]
فرح : من زينه يفكرون ياخذونه منج ههههه ردي عليه واللي يعافيج
ريم و ترد بذرابه : ألو
اسماء و فرح يسووون حركات حق ريم انهم يحبون بعض: هههههه
ريم : عزيز دقيقه بس ... حطته hold
و إتللللهم تطردهم من الدااار
ريم بصرااااخ :بررره بررره
فرح و ميته ضحك: وووين النعووومه مساع
اسماء و تقلد اختهاا : ألوووو :$
ريم و تدزهم تطردهم: برررره بررررره بس عاد عن الملاقه

ريم عقب ما طردتهم من الدار و خذت الموبايل : افففف
عزيز ناقعععع ضحك : ههههههه والله طلعتي مو هينه شلون قدرتي عليهم اثنيناتهم الله يعيني عليج عيل
ريم و متفشله : ههاااا؟! سمعتني
عزيز : ههههه فديتها انا والله اللي ترد علي بدلع
ريم و متفشله حدهاااا: عزوووز يلا عااد
عزيز: هههه .. ريومه
ريم بخجل: عيونهاا
عزيز: والله ما اقدر على زعلج , والله ما حس روحي عايش بدونج
ريم و تضحك: عشان تعرف تزعلني
عزيز: ما كنت بزعلج بفاجئج
ريم و ساكته مستحيه:.....
عزيز: لهدرجه تحبيني و تبيني
ريم بخجل : احبك اكثر من روحي والله
عزيز: أويـــحَ قلبي انــا ,ما اوصيج عااد كشخي باجر حق امي ...
ريم الله يستر لا تفشلني امك باجر: ليش شايفني هيلقيه ما اعرف البس
عزيز: لو تلبسين خيشه هم خياااااااااال
ريم: عبالي بعد ,عيل بلبس خيشه هههه
عزيز: ريووم
ريم: هلأ
عزيز: بتصيريـــن حقي ! بتصيرين مرتي! محد يقدر يفج حلجه علينا بكلمه ! بتصيرين ملكي !
ريم و مستحيه و بصوت ناعم : و بعديــــن معاك بسكره ترى :$
عزيز : اخخخخخ يا قلبي انا بس عل مستحى ! وين اللي يلوموني يسمعووونج





.....


من ناحيه ثانيه في بيت بوجاسم باليرموك ...
جاسم لابس ترننق و قاعد يطلع عدة الحداق ...
حصه مستغربه من ريلها وين رايح بهالليل: جاسم
جاسم و بإسلوب غريب: هلا بالزين كله هلا بأم بنتي
حصه و مستغربه من الحجي ... بخجل : هلا فيك .. على وين حبيبي؟!
جاسم و يقرب منهاا و يحظنها : بروح الحداق مع الربع ...بس إذا تبيني اقعد بقعد عشان هالعيونات
حصه وبس حاشها عقر بقر : هاا؟!... لا حبيبي على راحتك أنته روح معاهم و إرجع مبجر عشاني :$
جاسم و يبوسها بين عيونهاا :$ تامر الحلوه .. جم حصه عندي ؟! حصه وحده اطالع الله و اطالعها ..
حصه و حاسه انه هذا مو جاسم واحد مبدلينه : .....
جاسم و اهوه يلعب بأصابع حصه: إنشالله بحجز حقي و حقج نروح رومــا شرايج
حصه و بس خلاص غيـــبت : هـااا؟! بروحنا انا وياك؟!
جاسم و يبوس ايدها : انا و انتي و بس
حصه قامت تبجي ....
جاسم و ليمهااا حيل : اسف حبيبتي اسف , والله ادري اني مقصر معاج واايد ....
حصه تحظنه بكل قوه عندهااا ... تخاف تكون قاعده تحلم ماتبي هالجاسم يضيع من إيدهـــا :واالله يا جاســـم أحبك ! تكفيني نظرة حب من عينك
جاسم و يوخر راسها عن صدره و يمسح على شعرهاا .. يقرب منه يشمه .. و يطالعها بنظرة حُـــب عمرها ما حلمت فيها : لو تدرين يا حصه إني متحطم فيج بكل ما فيج! من نظرة عينج من سواد شعرج ! من قلبج ! من صبرج علي ... والله يا حصه إني ناوي اتغير معاج ! بخاف ربي فيج اكثر ... وعد من هالليله بس ارجع بعوضج عن هالسنين اللي طافواا ...
حصه و تلمه حيل و تبجي: شلي غيرك ....
جاسم يلمها و اهوه ساكت مو عارف اصلا ليش هالتغير و الحين ... كل اللي يعرفه انه يحب حصه و يبي يبين لها: أحبج هذا اللي غيرني ... أسف حصه
حصه : لا تتأسف جاسم المهم بالنسبه حقي انك حسيت فيني .....
جاسم : اخيه عليج , والله شكلي بكنسل طلعت الربع و اقعد معاج ..
حصه تطالع و تضحك ...: بنطرك روح و تعال
جاسم : لا بالله الشوق بيلعب فيني لعب ....




خالد توه راد بيتهم و مو طايق عمره
بوخالد: فندق مو بيت
خالد إنتبه على أبوه : السلام عليكم
بوخالد: و عليكم السلام , انته متى بتصير ريال ما تقولي
خالد: يبا و اللي يعافيك مالي خلق شي
بوخالد بعصبيه : خاااالد تكلم عدل!!
وإلا بدخلت ام خالد: شفيكم لا إلله إلا الله
بوخالد: ما تشوفين ولدج يطلع من الصبح ما يرجع إلا بالليل وإلا مطيح بهالشاليه
ام خالد و تحاول تهدي ريلها: شباااب يا بوخالد بعد لازم يونس عمره باجر وراه زواج و مسؤليات
بوخالد: واللي يعافيج هذا وي زوااج والله لو إني من بو جاسم لوو شنو ما ازوجه بنتي
خالد بضيق: تسلم يبا
ام خالد: هووو شفيكم صلوا على نبي يا جماعه.. يا خالد روان لو تلف الكويت كلها ما تلقى واحد احسن منك
خالد و يبي يروح داره .....
بوخالد : خالد تعال اقعد بكلمك
خالد افففف راح و قعد يم ابوه : تامر يبا ...وقعد يمه
بوخالد: يا خالد انا لما اقولك هالحجي و الا اعصب عليك , عشان مصلحتك , باجر وراك مسؤليات و زوجه مسؤل عنها , مو معقوله بتهدها و تطلع ....

خالد اخخ يا يبا لو تدري باللي فيني ! والله اتمنى هاليوم قبل باجر , بس اجابل روان ما اطلع ما اتحرك عنهاا :..... يا يبا انا كنت الصبح بالمطار بوجاسم توه راد ... و توني كنت عنده بعد !

بوخالد و حس انه ولده بدا يكبر بعينه ...حس فيه قد المسؤليه اللي بياخذها: بارك الله فيك يا ولدي , انت الله يهداك ما قتلي انه رجع عل اقل رحنا زرناه تحمدنالله بالسلامه,
خالد: مساع كنت مااره البيت عشان ايبه معاي حقك , بس جاسم قالي اهوه اللي بييبه
بوخالد: والله الواجب انا اللي ازوره و اتحمدالله بالسلامه ....
ام خالد: شفتوا شزينكم لي تصافيتوا موو مسااع
بوخالد يطالع ام خالد انه خلاص سكري السالفه :.... إلا وين عيالج الباجي؟!
ام خالد: توهم رايحين الشاليه ...
بوخالد: مشيعل يروح الشاليه امنه بالله , جراحوو شكو رايح لا يطب البحر ولا يحب الشمس
ام خالد: عازمين ربعهم
بوخالد: ليش ما رحت معاهم خالد؟! اتطمن انه معاهم ريال عود
خالد توني مو ريال : كنت بالشاليه و رجعت عشان اييــب بوجاسم من المطار ..
ام خالد: بس بعد ابوو الخطيبه لازم يداريه ههههه
بوخالد: إلا متى بنروح نخطب روان من ابوها؟!
ام خالد : والله على كيفك , جان تبي السبوع الياي
خالد بإنفعال :و ليش مو باجر؟!
بوخالد يضحك: باجر باجر اللي يبيه معرسنـا
......




عند باب بيت بوجاسم
واقف جيب قالص طرااد ... و الهرنات شايله الفريج
صلاح: صبركووو يا جماعه نطروا ندق عل ريال
سعد: خلصنــا طلع طابوقتك دق
صلاح: تطنز حضرتك على موبايلي؟! تدري فيه كاميرااا
سعد : لااااا والله الناس و صلوا كامرتين و انته ليما الحينك
صلاح : و شحقه كامرتين منوووو انته من جمالك تصور روحك مرتين
سعد: خلصناااا دق يا يباااا
صلاح و يدق على جاسم : هلووووو هيلوووو هاالووووو
جاسم : اسمعك والله اسمعك
صلاح : تسمعني شحقه ما ترحب فيني
جاسم و ماسك حصه : مو فاضيلك ...
صلاح: إيــــه يباااا كبر راسك , اول يوم حاجتك عندي ترحب و تهلي فيني
جاسم : اي حاجه واللي يعافيك , ...
صلاح: إيــــه نسينا ايام الزقاير
جاسم يضحك: ايااا صديق السوء
صلاح : بتقزرهاا؟! يبا انا اللي داق ... الرصييد الرصييد
جاسم يضحك: طول عمرك فقرر يا الله ثواني و أييكم


جاسم سكره من صلاح و يطالع حصه اللي كانت منزله راسها مستحيه منه:$
جاسم يرفع راسهاا بيده: الحلو شفيه منزل راسه؟!
حصه: ما بي هاللحظه الحلوه تخلص
جاسم و يحظنهاا : بس ارجع بتكون في لحظات مو لحظه
حصه : إنشالله ...

جاسم طلع من الدار بس رجع و طل عليهاا
جاسم: حصونه زهبي عمرج ابي اخو حق ليون
حصه تضحك و مستحيه : هههههه
جاسم و يطالعها بنظرة حُب: و الليله ابيـــه
حصه و بس ذابت من الحيااا: جاسسسسم وو بعدين
جاسم: إيه اقولج انه زهبي عمرج الليله
حصه و تقوم تدزه تطلعه من الدار: ههههه
جاسم : افااا ما تبيني افااا افااا
حصه و تطالعه مستحيه: لأ إنه ربعك تحت تتأخر عليهم

جاسم :حصه
حصه: عيون حصه
جاسم: بشتاقلج
حصه مستحيه: أناا اكثر والله
جاسم و يبوس راسهااا : ماراح أتأخر ....





صلاح و يشوف جاسم طالع من البيـــت
صلاح قاعد بالطراد و يصارخ : يــــــــا أسمر اللـــــــــون على شانك نشف دمي ,....
و عيوووونك السوود نسوني حليــــــب أمــــــي
جاسم : انتــه حليب بعارين شربوك

صلاح : افاااا يا بولين ما هكذا تورد الإبل
جاسم: مو قتلك حليب بعارين مشربينك
صلاح يضحـــك : نطوفهاا لك يا الشايب , ها تقعد معاي بالطراد و إلا بتركب مع الشبيبه
سعدو ينزل من السياره : جسوووم جنك نسيتنا و قزرتهاا مع بوصلوح
جاسم و يسلم على سعد: لا والله بس هذا, طلعت من بيتنا يقولي حليب امه دودهني
صلاح : إحــــــم إحــــــــم عن الحش
جاسم : يلا يبا تأخرنــــا , منتو حادقيـــن
الشباب الباجي بالسياره : يلااا جسوم إركب
صلاح : جسوم معاي معاي والله الوضع فلـــه ,
جاسم و يضحك على خبال رفيجه و يركب معاااه وره
صلاح : خشمــــك يا بعد شبزي
جاسم و يضحك على خبال رفيجه: أنته متى بتركد ؟! ليما الحينك خبل
صلاح: يا عمي شماخذ من الدنيــا خل نستانس
جاسم : استانس محد قاضبك

صلاح و يطلع مياديـــره : ها وين بنتك؟!
جاسم : لي يبت بنت إحدق فيهــا
....

وقفت سيارة الشباب عند الإشاره ...
صلاح قام وقف و خذا ميداره و يقط خيطه عل سياره اللي وراهم
البنات اللي بالسياره يضحكون عليه
صلاح : يربي شسوي كل البنات يحبني
جاسم : إقعد اقول لا ألسبك بهالغتره
صلاح و يقول حق البنات باي باي : مع غترتك إنته عبالك طالع سفاري
جاسم : إقعد يا الخبل فشلتناا
..صلاح و يقعد يمه : شنو خو خلنا نترزق الله ...
جاسم: ترزق ربك بالحلال
صلاح و يسوي روحه مستحي : ودي والله بس ماكو البنت اللي تستاهل جمالي
جاسم يضحك: ما ينوخذ منك حق ولا باطل
صلاح : والله اشتقت حق هالضحكه
جاسم: تشتاقلك العافيه .....




وصلوا الشباب بحر شويخ....
سعد: رومبيو و جولييت اللي ورا يلا نزلوااا
صلاح: بو سعده مفرق الجماعات ومخرب اللذات
سعد : إنزل خلصنا يا القرقه, خل إنزل الطرااد
جاسم و يكلم سعد : ترى خثاقي معاي ..
صلاح: كل واحد و خثاقه لا تخلط خثاقي بخثاقك
جاسم يطق صلاح على راسه:هههههه

كانوا 6 شباب .. جاسم و صلاح و سعد و 3 ربعهم ....
نزلوا الطراد و بلشوا بالحداق
صلاح يصارخ: ياااا جماعه بخاطري انزل جم قرقور
سعد: شقراقيره بهالليل , يا عمي من له خلق ينزل إيبهم عقب
صلاح: محد قالكم تيبوناا نحدق بهالليل
سعد : لا و أزيدك من الشعر بيت الموج عالي
صلاح و يصارخ و يناقز: يا حسسسسرتي رحت من جيس أهلي ...
الشباب يضحكون على ينون رفيجهم ....
بس جاسم كان سرحان , قاط خيوطه و قاعد يفكر....باله مو معاهم كلش
صلاح و يقرب من جاسم: اللي ماخذ عقلك
جاسم و انتبه عليه : هلا بوصلوح
صلاح و قعد قبال رفيجه: شفيك جسوم؟!
جاسم: ماكو والله افكر ...
صلاح و يغمزله: إي عاد قلنا تزوجت لا تقعد تسوي روحك بو المسؤليات
جاسم يضحك: لا افكر بــ لين بنتي صايرلها جم يوم تحن تبي تروح البحر
صلاح: اي مو قتلك ييبها نحدق فيها ما رضيت
جاسم يضحك على خبال رفيجه: مينون ايبها لك , ... خذى موبايله و إتصل على بنته
جاسم : الوو ساره
ساره معصبه: هلاا جسوم, ترى شوف بنتك إن طاحت بيدي ذبحتهاا
جاسم و يضحك: والله ان قربتني من ليون ذبحتج
ساره: لاااا والله بنتك حاذفتني باللعبه على يبهتي سوتلي صعروروه
جاسم و مات ضحك : زيــن تسوي فيج بنت ابوها والله
ساره: هيـــن جسوم رد البيت و شوف بنتك إذا عندها شعره وحده براسها
جاسم: حبيبتي انتي , انتي العوده انتي عمتهاا المفروض شسمه
ساره: شسمه ما شسمونه ذابحتها ذابحتهااا
لين تقرب من ساره: عميمه اسفه
جاسم : كااااهي قاعده تعتذرلج ذربه بنتي
ساره : إنطر إنته , تعالي بوسي صرعورتي
لين و تقرب من ساره تبوس يبهتها: اسفه عميمه ما كنت بعورج بس يبهتج كبيره
جااسم و مات من الضحك : ههههههههههههههه
ساره و تشهق: أيــــــــــا الخايسه تعالي بذبحججج
جاسم : خليها عااد سويره , عطيني ياها بكلمهااا ...
جاسم: الوو حبيبة أبووها
لين و تصارخ : بااابااااا ساروو تقرصني

جاسم يضحك: هههه محد قالج تطقينهاا ..
لين :اهيا يبهتها كبيره و تضحك ههههه
جاسم بس يسمع صرااخ ساره
جاسم: ليونه حبيبتي ...لا تطقينها صيري عاجل عشان اوديج البحر عقب باجر
لين: انزين ...بابا انته وينك؟!
جاسم: انا شوي و برجع
صلاح و يأشرله انه يبي يكلم لين
جاسم : شنو مينون اعطيك تكلم بنتي
صلاح: خوو بخطبها لا تخاف
جاسم و يضحك : هااج بابا كلمي عمج
لين : منو عمج؟!
صلاح بصوت ناعم: الو حبيبتي
جاسم يسحب الموبايل من صلاح: خبل انت ؟!
صلاح: خوووو شنو بتصير مرتي على سنة الله و رسوله
جاسم و يحاجي بنته: حبيبي لين ,,, تعشي و نامي لا تتهاوشين مع ساره عيب
لين: بابا منو هذا؟!
جاسم: هذا واحد مينون
لين تضحك: هههه
جاسم : يلا بابا سمعي كلامي
لين : إنشالله ...و تبوس السمااعه حيــــــــــل
I love you
جاسم : I love you too

و سكر حاسم من بنته
صلاح و يمثل دور العاشق: فديتهااا تقولك قول حق صلاح
I love you
رومانسيه بعد عمري
جاسم و يحذف البيبسي على صلاح: اضبطلي حالك لا اضبطلك يااه :@
صلاح: شالعم الحجر , خو خطيبتي خلني اغازلها
جاسم عطاه خزه و لف ويهها يمسك خيوطه: كلش ولا لين عااد ماني مزوجها بخللها عندي اصلا
صلاح : الله يخليها لك حجي
...
وظلوا الشباب ضحك و سوالف و حداق ...

صلاح: يااا جماعه طاح العشا
جاسم : اي عشا واللي يعافيك
صلاح: عبالكم امي تطلعني من البيت بدون مؤنه
سعد : يعني ام صلاح اللي طابخه
صلاح: ممموش تاكل ايديك وراه
سعد: يــيب يواعه عاد

... قعدوا ياكلون الشباب و كل واحد يتطنز على صيد الثاني
صلاح: انا قتلكم الحداق مو الفكره منه الصيد الحداق عشان تتعلم الصبر و انا انسان ياي اتعلم الصبر مو هدفي السمج , مع إنه خوش شعوم عند جسوم بس ما عليه
جاسم يضحك:إيه حااط عينك علي عندي , يبــا حلالك اخذ اللي تبي
صلاح: باخذ شدعوه ناطر عزيمه منك يبـا انا إنسان ويهي منجب بالعربي الفصيح
......

سعد و واقف عند طرف الطراد: شباب المكينه معلقه
صلاح : وليــــن مع طرادك السكه, لا و مسميه البوم يعني الأخ يشجع التراث
سعد و يضحك : خلصني تعال ساعدني
صلاح: شعرفني اصلح انا , ويـــن مهندسنا بس تعال ضبطنا
جاسم : هههه أنا مهندس بترول مالي شغل بالمكاين
صلاح و يعني جاك الحركه : لي رحت مصر ما ينادونك باش مهندس؟!
جاسم : بلـــي
صلاح : إيـــه خلاص عيني يعني توفهم بكول حاجه
جاسم : هههههه
صلاح: احس ناقصني كاسور و انا اتحجي
جاسم و راح عند سعد يشوف المكينه معاه: شكله مجلبه خيوط فيه ....
سعد و يفصخ بلوزته : خلاص انزل افجهمم بس اقضبلي الليت
جاسم : خلك أنته انا انزل
سعد ماسك الليت حق جاسم
جاسم : عطني سعد الليت احطه بحلجي احسن ....
سعد عطى جاسم الليت : خل إيبلي ليت انا بعد و أنزل معاك
جاسم يأشره ok

سعد : صلوحكه روح عند جاسم نزل يفجج الخيوط
صلاح و يقعد عند طرف الطراد: هااا يا باش مهندس بشر
.......
صلاح يصارخ: جسووووم جسوووم
سعد: شفيك تصارخ
صلاح: مادري وين راح جسوم
سعد و إيـــي معاه الليت : شنو وين راح؟!!
سعد يقرب ليته صوب المكينه: جاسم جاااسم
صلاح: جسووم ترى مو خوش دقه خلصني إطلع
سعد يطب البحر : هااك صلوح اقضبلي الليت
الشباب الباجي قربوااا
....: شالسالفه شصاير؟!
صلاح: جسوووم نزل يصلح المكينه و مادري وين راح
سعد و جم واحد نزلوا البحر يدورون جاسم ...
بس مو لاقينه خير شر
صلااح : وين بيروح يعني أغطس سعد واللي يرحملي امك دوره
سعد يصاارخ على واحد من الشباب : دق على خفر السوااحل

وظلوا الشباب فوق الربع ساعه يدوروون جاسم مو لاقينه فص ملح و ذاااب

سعد و يصعد الطراد: لا حوله و لا قوته إلا بالله ! وين رااح
صلاح و ليما الحينه بالبحر يدور رفيج عمره ...
سعد : إطلع يا صلاح كاهم خفر السواحل يوو
صلاح و مو مهتم حق كلام اي احد ... خايف على رفيجه! انا اللي يبته معانا !! انا اللي خليته ينزل البحر......


خفر السواحل سوو تمشيط حق المنطقه كلهاا بس مو لاقينه
الضابط: والله يا شباب مو لاقينه الموج عالي
صلاح بصراخ :شنو مو لا قينه ... و ياخذ الليت و يرد يطب البحر
......
مرت 3 ساعات و جاسم ماله بينـــه عيزوا يدورونه بس مو محصلينه
واحد من الغواصيــــن : كاااااهووو كاااهووووو لقينــــاه

كل الشباب يطالعووون مكان الغواص اللي ساحب معاه جاسم !
ساحب معاااه جثـــــــت جااسم !!!!!



شنو مصير حصه؟!
شنو التطورات اللي بتصير بين خالد و روان!
ريم و عزيز


تابعوااا الجزء السابع و بتعرفون
سامحوني عل تأخير بس أعتقد هالبارت كان طويل كفايه