●◦● ~ [ليــــت اللي باقـــي من عُمــري ويـــاك]~●◦●

هـاي نأسف إنه البلوق صاير اقرع ;p

, خلل فني و يتضبط و الحين تابعوا الروايه

●◦● الجزء الثالث ●◦●

روان و أهيا داشه البيت مو قادره تشوف جدامها من الصداع اللي حايشها , و حالتها تكسر الخاطر
مكياجها مخترب و عيونها وارمه و محموره من البجي

ساره: هلا والله باللي ما ترجع إلا العصر ما تسأل عن إختها حبيبتها,تقول إختي محكوره خل أقززهـا شوي تشم هوى !
روان بتعب : هلأ
ساره: شفيج ؟!!
روان: شفيني
ساره و قامت حق إختها و مستغربه من منظرها:رون حبيبتي شفيج ؟! شنو يعورج شحاسه فيه؟!
روان: صداع بس من هالشمس و هالصيفي تعبانه ;s
ساره و أهيا مو مقتنعه بكلام إختها : أهاا , إي صج روحي حق جاسم بالدوانيه يبيج من الظهر ناطرج
روان و ماتت من الخرعه: ليش شفيه شعنده !
ساره و شكت ليش إختها خايفه: مافيه شي بس ما شافج اليوم و قال بس توصلين روحيله
روان و هدت شوي: تعبانه ساره لي قعدت من النوم أكلمه
ساره و عارفه الموضوع : لأأأأأأأ !! روون موصيني أهوه أول ما توصلين تروحيله
روان و حست بصداعها زاد عليها : خلاص الحين أروحله


مشت روان بخطوات متثاقله لي دوانية بيتهم
جاسم : يا هلا روان , حياج
روان: الله يحيك , شلونك؟
جاسم : بخير دامج بخير
و قعدت روان قبال جاسم ....
....: و أنا ماراح تسلمين علي؟!
لفت روان بصدمه على الصوت اللي كان قاعد بأخر الدوانيه !!
روان: شششلونك خالد
خالد و إبتسامه صفرا تعلو وجهه , و نظره مملؤه بالحقد موجهه لها : أنا بخير كل ما شفت بنات خالتي بخير
روان تتلفت خايفه , قامت تبي تطلع من الدوانيه
جاسم: روان على وين خلج قاعده ,بغيتيج بموضوع!
روان: تعبانه جاسم لي قعدت من النوم قولي موضوعك!
خالد: أنا اللي بغيتج بموضوع مو جاسم
روان و خذت نفس عميق وحاسه بمصيبه بتحوشها ... لأ يا خالد لا تسوي اللي قلت عليه,
والله أموت من دون سليمان , ما أتحمل لحظه بدون سليمان , سليمان عمري, سليمان حلمي اللي عشت عشانه,سليمان بادي يحبني
أنا حاسه انه سليمان لي
خالد : روان وين رحتي؟!
روان: معاك سليمان
روان !!! بغت الأرض تنشق و تبلعها حزتهـــا ... غبيه غبيه غبيه !!
خالد و حس روحه يبي يذبحها .. لهدرجه مسيطر عليج حبه ! كل الأسامي صارت سليمان عندج
خالد: سليمان؟! منو سليمان روان؟
جاسم: سليمان منو؟
خالد و بإسلوب خبيث :
مادري روان بدال ما تقول إسمي قالت سليمان , عندكم واحد من أهلكم إسمه سليمان مهم لهدرجه بالنسبه لها؟!

روان و منصدمه بس تسمع الحوار اللي يدور بين خالد و جاسم ! إلسانها إنربط مو عارفه ترد مو عارفه ترقع حق روحها
جاسم و بحسن نيه : جنه دكتورها بالجامعه إسمه سليمان
روان و حست أخوها أنقذها :إي إي دكتوري
بس خالد و روان عارفين منو هالسليمان !
خالد: جاسم مثل ما قتلك ما عليك أمر بغيت روان بجم كلمه و ماشي !
جاسم و معترض على فكرة أنه إخته تقعد بروحها مع ولد خالته , بس الموضوع بصالح إخته :
على خير خمس دقايق و راجع لكم
روان: على وين , خلك جاسم ... و تطالع إخوها بنظرة ترجي!
خالد و حب يخرع روان أكثر: إيه جاسم إذا حاب تقعد و تسمع كــــــــــــــــــــــــــــــــــل اللي بينقال ترى عادي ,
أنا إنسان ما أعرف أخش شي و خصوصا إذا كان الموضوع بيهمك
جاسم و يبي يخلص من الموضوع : 5 دقايق و راجع لكم ما عليه !
طلع جاسم و روان طلعت روحها معاه من الخرعه و الرعب اللي سيطر عليها !!
خالد و بهدوء مغاير للي يحس فيه: روان تعالي قعدي ...





في أحد الكافيهات بإيرلندا
منار و منال خوات عبدالعزيز
...
منار: كويتي
منال: لبناني
منار: أقولج كويتي
منال: والله لبناني
منار : لاتحلفين , إشعرفج فيه إنتي أصلا , والله شوفي إشباها , أشباه كويتين
منال: شوفي العيون الزرق و الشقار , هذا وينه و الكويتي وين
منار: تراهنين إنه كويتي
منال: على شنو بتراهنين؟!
منار: اللي تبينه
منال : أوكي , بس شلون بتعرفين إنشالله
منار: بتشوفين
منال: تعالي يا المينونه وين رايحه ..
منار و بحكم إنها تدرس لها 5 سنين بره , صار عندها نوع من الجرأه اللي تصل إلى حد الوقاحه أحياناً!

منار: هــاي
إنصدم الشاب اللي قاعد بزاويه بروحه بالكافيه من البنت القمر اللي يايه تكلمه !
كانوا منار و منال , بنات مميزات بجمالهم , على الرغم من إنهم كانوا يدرسون طب إلا أنهم كانوا مهتمين بأناقتهم و جمالهم بشكل مبالغ فيه .
الشاب: هــ هاي
منار: do you speak arabic?
الشاب: ya sure
منار أشوه طلع عربي: إنته كويتي؟!
الشاب و إنصدم من سؤالها: إيه كويتي
منار و إستانست إنها غلبت إختها, : أول مره أشوفك بهالكافيه
الشاب: إيــيه أول مره أزور إيرلندا بكبرها
منار:أهــا أنا من الكويت بعد , إلا شسمك؟
الشاب و مازال منصدم من جرأتها : محمد
منار: عاشت الأسامي محمد , حياك الله بإيرلندا ..
have a nice day
بــاي ...


وراحت تتمشى بخطوات واثقه جدام إختها
منار و أهيا تلبس نظارتها الشمسيه و تغني : أنا كويتي أنا قول و فعل
منال: جذاااابه كويتي؟!
منار و الإبتسامه شاقه ويهها : والله ,
منال: عيون زرق و كويتي أكيد فيه عرج
منار : يلا قومي بروح ألحق على القروب بالمكتبه, و حسبي حسابج رهاني عشا بمطعم محترم
منال و تشيل جنطتها : شماخذه منج غير المخاسير , يلا قومي

طلعوا منار و منال من الكافيه و محمد ليما الحينه يطالع المكان اللي كانوا قاعدين فيه البنات , و منصدم من جرأة هالبنت اللي دخلت قلبه !

كلمتني قصدها لفت إنتباهي
شاغلتني قبلها مرتاح و لاهي
أه يا عيونك تقول حركت كل العقول
شفت فيها سر خافي لو حجت شرحه يطول
لا إرادي داعبت حركة يدها الشعر
, تبتسملي بالخفا ضحكه تتحدى القمر





ريم تتقلب بفراشهها مو قادره تنام من اللي سوته اليوم
ريم: يعني ما لقيت إلا أمه , ياربي أنا كله جذي, شسوي بروحي شسوي
أهوه صارله مده يلمح على خطبه , بس ما ظنتي بيتم شي عقب اللي صار
... تنهدت من قلبها و لمت مخدتها .. يحلها ألف حلال..ما ابي افكر أكثر بموت من التفكير

.. تبطـــل الباب عليهـــا حيل و بصراخ بنات ...
..: يا الخايسه إشتقنالــج
ريم و نقزت من فتحت الباب: وااااي بعد جبدي خواتي
أسماء: إيه أكيد ولهانه علينا مدام قاعده بالديره بروحج مع حمود
ريم: إيه والله ضايق خلقي ماكو أحد أقرقر معاه أبي أفضفض فيني سوالف
فرح: ريوم أمبيه لا تطوفج ماليزيا شي شي مو صج عجيبه
ريم: مالت عليكم ما فيكم صبر تنطروني أسافر معاكم
فرح و تنسدح على فراش ريم: أفا عليج عادي ما عندنا مانع نسافر مره ثانيه معاج
أسماء: إيه والله ما نقول لأ حق السفر, بس ولي يعافيج ما نبي ماليزيا ملينا منها
ريم : يحليكم أفكر أخذكم معاي , أصلا قررت أسافر أنا و اخوي العزيز بو جسوم بروحنا
أسماء وفرح ماتوا من الضحك
ريم: في شي يضحك أنتي وياها؟!
أسماء: عيدي عيدي مع منو بتسافرين؟!
ريم: مع محمد
فرح: أهـــااا و وينه محمد الحين
ريم: شدراني يمكن بداره نايم
فرح و تحرك إيدها نفس الطير: أخوج طار
ريم : شنو؟!
أسماء و ميته ضحك على ريم: أخوج العزيز إستقبلنا بالمطار عطانا سويج سيارته نرد فيها البيت و سافرررررررررر
ريم: جذااااااااااااااابه , الحقير قايل بيسفرني معاه!!!
أسماء: راجو بيسافر تبين نسفرج معاه
ريم و عصبت عدل : أنااا أوريكم فيه
طلعت ريم من دارها معصبه وركض لي الصاله !
ريم: يُبــــــــــــــــــــــــا يُمــــــــــــــــا
بو ريم : شفها تصارخ؟!
أم ريم :علمي علمك, هالبنيه كلا مقروصه
ريم و واقفه جبال أمها و أبوها .. خذت نفس قوي من الركض: أول شي حمدالله على سلامتكم
ثانيا أنا بنتكم و إلا مو بنتكم؟
أبو ريم: هههه شفيج هالمره بعد
ريم و تبدي بدموع التماسيح: ُيبا أنا اقعد الصيف كله أكرف و أدرس و أخر شي كلكم تسافرون و أنا ما أسافر حرام عليكم
أم ريم : وليين بدينا بالدلع عاد, والله محد قالج قلنالج بلاها صيفي و سافري معانا أنتي ما رضيتي
ريم: والحين شلون , محمد سافر و خلاني ,وأنا أسبوع واحد و كنت بخلص
بو ريم : خلصي بالأول و يصير خير
ريم : يُبـــا من الحين حط إبالك قعده بالحر بالكويت ماني قاعده
و راحت دارها معصبه ! تصفق وراها كل باب تمر عليه بكل قوه

...





عبدالعزيز: ها يمـا شقلتي
أم عبدالعزيز و دمعه بعينها: تحبها؟!
عبدالعزيز: ما أتخيل حياتي بدونها
أم عبدالعزيز : من بنته شلون صايره شلون عارفها , لا يكون من هالبنات اللي سيرتهم على كل إلسان
عبدالعزيز : لااا يما بنت حموله طيبين عيال ال.."....." ,و عرفتها من الجامعه أنا كنت سنة تخرج و أهيا سنه أولى و حبيتها يما دشت قلبي
أم عبدالعزيز: والله يا عزيز إني أحلم باليوم اللي أزوج فيه واحد من عيالي
عبدالعزيز: يعني موافقه ؟!
أم عبدالعزيز: أشوفها وأقعد معاها و نسأل عنها و الله يكتب اللي فيه الخير,,,
عبدالعزيز: بتعجبج يما أكيد بتعجبج
أم عبدالعزيز: ههه ذايب وليدي بالحب , إلا شسمها , وين بيتهم ؟
عبدالعزيز: إسمهــا ريم , وبيتهم بالفيحــا
ام عبدالعزيز: خلاص عيل أسأل عنهم و أشوف رقمهم و يصير خير
عبدالعزيز و بحماس: عندي عندي كل أرقامهم , و أنا سائل عنهم والله يما زينين
أم عبدالعزيز و تضحك على طيش ولدها : عندك رقم أمها ؟!
عبدالعزيز: إيــــه مره داقه علي منه
أم عبدالعزيز : خلاص باجر الضحى أتصل عليها
عبدالعزيز و ياخذ تلفون البيت و يحطه بحضن أمه : خير البر عاجله ! ليش تأجلين دقي الحين
أم عبدالعزيز : شلع قلبي هالولد , نشوف تالية هالريم اللي يننتك
عبدالعزيز و يتصل على رقم أم ريم و يعطي السماعه حق أمه
أم عبدالعزيز: أمها شنادونها فيه أم شنو؟!
عبدالعزيز بصوت واطي : محمد محمد
أم ريم :ألوو
أم عبدالعزيز: ألو السلام عليكم
أم ريم و مستغربه من الصوت: و عليكم السلام يا هلا , منو معاي؟!
أم عبدالعزيز: والله يا أم محمد معاج أم عبدالعزيز و حابه أكلمج بموضوع
أم ريم: هلا أختي, خير إنشالله شموضوعه
أم عبدالعزيز: خير خير أنشالله , والله داقه أبي أناسبكم بغيت أخطب بنتج ريم حق ولدي عبدالعزيز
أم ريم و بفرحه: الساعه المباركه إنشالله , إلا شلون عرفتي ريم ؟!
أم عبدالعزيز و تطلع لها جذبه:وحده من الحريم قالتلي عنها
أم عبدالعزيز : متى نقدر نزوركم إنشالله و نشوف البنيه؟!
أم ريم : حياكم الله بأي وقت ,
و إتفقوا على اليوم و الوقت اللي بتزور أم عزيز بيت ريم ..
.
عبدالعزيز و مو مصدق اللي يسمعه: إيه و بعدين يما شقالت؟!
أم عبدالعزيز: و بس قالت الخميس عقب صلاة العشا حياكم و عطتني العنوان
قرر عبدالعزيز إنه ما يقول حق ريم عن شي و يفاجأهــا بالخطبه يوم الخميس ,





حصه: شلون خليتهم بروحهم و طلعت , ما يجوز يا بو لين , خلوه خلوه غير شرعيه
جاسم و راسه صدعه من حنة مرته: إختي و ولد خالتي و ببيتنــا و خمس دقايق و راجعلهم ! و نظره شرعيه
حصه و مو مستوعبه: نظره شرعيه شكو؟!
جاسم : خالد خطب روان مني مبدئيا قبل ما يرجع الوالد , قال يبي شوف رايي و راي روان عشان حتى لو صار رفض إنه خالتي ما تاخذ بخاطرها ..
حصه: أهــااا, بس ولو المفروض ما تخليهم بروحهم , و بعدين شنظرته شايفها و شبعان منها
جاسم : حصه بس عــاد !

طلعت حصه من عند جاسم و اهيا مو مقتنعه بعذر خالد, أصلا خالتهم ياما خطبت روان كــ كلام و روان ترده تقول إنه خالد أخوها






أم ريم : قتلج الخميس زهبي عمرج المره بتيي عقب صلا العشا
و ريم حاطه إبالها عزيز: يمـــا شفيج قتلج ألف مره ماااابي أتزوج الحين, يعني ما أبي !
أم ريم: شنو ما تبين يعني؟! كلها هالسنه و تتخرجن شناطره بعد؟!
ريم : إيــــه مو غصب أخلص هالسنه عقب أفكر بالزواج
أم ريم و شكت بالوضع: ريمووو لا يكون في أحد إبالج و إلا عندج خرابيط مني و إلا منــاك والله يذبحج محمد
ريم و خافت من كلام أمها: لااااا يما شكو سملله علي ويني و وين هالسوالف ماعندي وقت أصلاا
أم ريم : عيل مثل ما قتلج الخميس تتكشخين و تتلبسين
ريم : يماا و بعدين يعني ما نخلص ! ما أبي , يـــّـــــه
و هدت أمهــا و راحت دارهـا متضايقه , خذت موبايلهــا و ...

عبدالعزيز الإبتسامه شاقه ويه من شاف رقم ريم رد عليها و أهوه يغني:
هلا باللي أحبه كثــــر تعــــذيبه
ريم : هلا عزيز
عبدالعزيز و حس فيها متضايقه: شفيه حبيبي متضايق؟! شفيج حياتي
ريم : أمــي يا عزيز أمــي !
عبدالعزيز و فهم السالفه بإبتسامه: شفيها أمج؟!
ريم : وحده مره داقه عليها تبي تخطبني , أقول حق أمي مابي تقولي غصبن عليج
عبدالعزيز و يضحك بقلبه: إنزين شحقه متضايقه؟
ريم و متفاجأه من رده: شنو يعني السالفه ما تضايق
عبدالعزيز و حب إنه يلعب عليها أكثر: لأ عاديه السالفه يعني , كل بنت تنخطب وضع طبيعي,المفروض تفرحين
ريم بعصبيه من بروده: أهـــااا إيه لا عيل أوكي الخميس بكشخ و بتزهب حق الخطبه عدل , وإذا عجبني الريال بوافق عليه
عبدالعزيز و بيحرق أعصابها: من حقج
ريم و تضايقت من عزيز, شنو ما يحبني ؟ يلعب علي؟ : باي عيل بقول حق أمي





روان دشت دارهــا و صكت الباب عليها
ميته بجي : شفيه هذا مينون شالحجي!!

خذت موبايلهــا و دقت على ريم بس ما ترد ... زادت بالبجي أكثرر
تبي تشكي حق أحد , مهمومه , متضايقه الدنيا مسكره بويههــا
و من دون اي تردد دقت رقم حافظته عن ظهر قلب
سليمــــان : أهلاً أهلاً
روان و بصوت مخنوق: سليمــان و بدت تبجي
سليمان و أخترع شفيها هذي: ألو روان ؟
روان و عقب ما وقفت بجي :سليمان أنته طالع
سليمان : إيه مع الربع شفيج؟!
روان و بالغصب تطلع منها الكلمات: سليمــان ولد خالتي تقدملي و مغصوبه أوافق عليه و قعدت تبجي
سليمان و من دون أي أهتمام : يلا عالبركه
روان و تدري فيه مو حاس فيها: بس أنا ما أبيــه
سليمان: تتقبلينه مع الأيــام
روان و بصوت مخنوق من كثرة البكــاء: مــا أأبيـــــــه تفهم !!
سليمـــان: ليش يعني ما تبينه؟!
روان وحست أنه ماكو أمل مضطره تصارحه: بقلبي غيره
سليمان و أهوه يستهزء فيها: ههههه إي عدل أم بقلبي غيره
روان تبجي :.....
سليمان قام من عند ربعه: روان ما تبينه خلاص قولي حق اللي بقلبج يتقدملج
روان و زادت بالبجي: ما تفهم عمرك ما راح تفهمني !!
سليمان و مو فاهم عليها : روان فهميني قوليلي شفيج شالسالفه
روان : سليمان ليما الحين مو حاس منو اللي أبيه منو هالإنسان اللي مو قادره أعيش بدونه
سليمان: فهميني منو؟!
روان و تشاهق من البجي: أنته أنته يا سليمــان ! أنته يا سليمان أنته الإنسان اللي ماني قادره أنام الليل من التفكر فيه!
أنته اللي ملك قلبي أنته اللي احبه و أبيه ... و زادت بالبجي
سليمان و منصدم من اللي سمعه مو عارف شيقول: بس روان أنا من أول ما عرفتج أتوقع إتفقنا انه علاقتنــا تكون فريند بس
روان مو قادره تتحمل صده أكثر من جذي : سلمــان لا تزيد ,لا تحاول أنك تفهمني أني كنت اقدر اتحكم بعواطفي ! الحب إيـي بدون ما نخطط له
سليمان: أسف روان مادري شقول بس إنتي كنتي حسبت إخت لا أكثر ولا أقل ! و ما اقدر إني أبادلج بشي من اللي تفكرين فيه
روان و ميته من الصياح: سليمـــان قاعد تقتلني بكلامــك !!! قاعد تقولي خلاص حياتج إنتهت
سليمان و تضايق منها و من بجيهــا: روان يعني الحب مو غصب بس يعني لا تقطين روحج علي أكثر ! حطي إبالج
no WAY
أفكر أرتبط بوحده تمشي و تكلم فلان و علان !
روان و تبجي تبجي مو قادره توقف مو متخيله انه هالإنسان اهوه نفسه اللي حبته: والله سليمان ما حبيت ولا كلمت غيرك و تبجي ...
سليمان : روان بس عاد يعني عن البجي اخذي ولد خالتج و إنسيني !! و صك الموبايل بويهـــا

روان تطالع الموبايل و دموعهـــا مو راضيه توقف !!
إنسيني إنسيني بهالبساطـــه تقولهــا ! سليمان والله أحبك والله مو قادره أنساك مو قادره أتحمل بعدي لحظه عنك!
كرامتي و دستهــا إنذليت لك بما فيه الكفايه و مو راضي تبادلني ربع اللي أحسه !
أنســــاك ! بهل سهوله؟! أنسى عشرت 4 سنين ! أنسى اللهفه الشوق !
أنسى الحب انسى احلى شعور حسيته و أنــا معاك !
بجـــت روان بجـــت بقوه بجت حبهـا الضايع ! بجت حبهــا اللي كان من طرف واحد!
بجت سذاجتهــا بجت غبائهـــا !!!!


...[ما بين بعينك على كثر ما جاك
لا وحسافه ليتني ما عطيتك
تخطي و أعذرك و أتحمل خطاياك
هويت غلطاتك كثر ما هويتيك
و الحين روح أرجوك ساعدني أنساك
ولا تجي حتى لو إني بغيتك
و إن مر في بالي بقايا لذكراك
بحاول إنساها مثل ما نسيتك ..]




ترقبوا الجزء الرابع و التطورات اللي راح تمر فيها أحداث القصه