أول روايــة طويله نوعــا ما لي أتمنى أنكم تتقبلونها و إتابعونهـــا ...
●◦● ~ [ليــــت اللي باقـــي من عُمــري ويـــاك]~●◦●
مو كل من حبيناه إنكتبلنــا نعيش عمرنـا معاه ,
الحب يسكن قلوب مو مخططه للحُب,
قلوب حست أنه الحب راح مع أول نسمة صيف !
قلوب مجروحه تُـداوى بحب يسيطر على كيانهــا ,
تابعوا الأحداث و إنشالله تعجبكم ....
الروايه باللهجه الكويتيه ,,
و شخصيات القصه راح تعرفونها مع القصه
ما راح يكون في تعريف لهم , أنتو بتعرفونهم بنفسكم : )
●◦● الجزء الأول ●◦●
روان: شفيـــج!!!! شفيــج تبجين يا شقول وقفتي قلبي؟!
... ريم:رون بموت من الحره ماني قادره أتحمل أكثر بس خلاص بهده أنا الغبيه اللي متمسكه فيه ليما الحين !
روان: ليما الحينج أنتي ؟ تتناجرين معاه على سبب تاااااااافه و تتحلفين و تتوعدين ما تبينه و وعوع عفتيه و مردج أنتي اللي بتراضينه
خُبز إيدي أعرفج ;p
ريم: سبب تافه ؟!
الحين انا اتناجر معاه على سبب تافه !!
هذا و انا رفيجتج بدال ما توقفين معاي , الشرهه علي اللي داقه عليج
[جـــــــــــــــ,,,ــــــــــــك]
أنقطع الإتصال
روان : ما تستحي والله !!انا تصكينه بويهي , مردج بتدقين
و طولت روان على الأغنية اللي كانت تسمعهـا ...
"قالــها قال أحبك قالهــا من ثواني قالــها "
...
ما مرت ثواني و وصلهــا مسج
" مالت عليج دقي علي حسسيني أنج مهتمه رفيجتج أنـا "
روان: ههههه لا بالله خوش رفيجه ترنين السماعه بويهي و تبيني أنا أدق عليج؟
ريم: شحقه تجرحين مشاعري
روان: أسفين يبــا قوليلي شمسوي معاج هالعزيز هالمره شـ مغبر شــ مهبب
ريم: واي رون اكرهــا بس بس عافك الخاطر مليت تعبت ما أقدر
روان : جايده السالفه هالمره قولي قولي شصاير
ريم : صوت سياره عندج؟! شنو طالعه
روان: الحين هديتي سالفتج و من شميتي ريحة طلعه نقزتي ;p
ريم : لأ أنه غريبه مو عادتج تطلعين الساعه 11
روان : ماكو راده خالتي بيتها سيارتها خربانه ,يلا قولي سالفة عزيزانج
ريم: سالفه طويله طويله ! ما تنقال بالتلفون مريني خل أقولج ياها
روان : شمرج بهالليل , باجر قوليلي بالجامعه مدام ما تنقال بالتلفون
ريم : إنزين باجر اقولج سالفة الحقير .. إإي و ترى بسكر موبايلي عشان حتى لو فكر يدق ماني راده عليه
روان : ههه الحقير هــا ؟ باجر نعرف السالفه
ريم : يلا تصبحين على خير اشوفج الصبح
روان : و أنتي من أهله , سكري موبايلج عدل ما أوصيج هههه
ريم : ايه لا تحاتين اوريج فيه أنا ,
روان: يلا حجيه روحي نامي
ريم : يلا باي .....
روان: باي
ريم : لحظه لحظه !!! قالها؟@@
روان: شنو؟
ريم: قالج أحبج ؟ قالها؟!
روان : ريوم خمدي أحسلج لا تقزرينها على مخي
ريم: ههه مادري اسمع ذكرى تغرد عندج قلت بعد اكيد قالها
روان :باي قلنا
ريم: ههه باي
! ريم قطت روحهـا عل فراش و تفكر .. أنا اعلمك يا عزيز أنااااا أوريك .. ما أكون ريم إذا ما سنعتك ! و سكرت موبايلها و قعدت تتقلب ليما نامت !
روان و أهيا بالطريج تفكر برفيجتها و بحبها اللي ميننها و محسر فيها , ....
أنا ليش ليما الحين ما سمعت كلمة أحبج بصوتك !
ليش ليما الحين مو راضي تعترف باللي بينا
ليش مو راضي تحسسني اني شي مهم بحياتك
!!!انك تحبني
.....
وقف تفكيرها على رنة موبايلها ..
روان: مافيها صبر اكيد دقت تكمل سالفتها
روان: هـــا أسمع
:... ناطره أحد يدق؟
روان : وي لا عبالي ريوم ... هلا شلونك
:أهــا .. لا ... تمام أنا بخير , أنتي شخبارج
روان: ماشي الحال
...دقيقة صمت مرت بينهم
لا شعوريـا طولت روان على أغنية تحبهـا
" لو تحس إبــ ضمى روحي لفرحه كان صابك من مقاومتي ذهول "
:.. شكلج طالعه؟
روان : إي
:.. تحبين ذكرى وايد ؟
روان :ها ؟!!!
:... كل ما كلمتج تسمعينها
روان تفكر ما كو إحساس والله ما كو أحساس , حسسني مهتم شوف الساعه جم و تشوفني طالعه
حسسني بأهميتي بحياتك
:... روان روان معاي؟!
روان: إي سليمان , شكنت تقول؟!
سليمان:.. بالج مو معاي كلش , أقولج أنا مسافر الحين تامرين على شي
روان: شنو بتسافر الحين ؟! وين بتروح و مع منو ,و ليش ما قلت من قبل
سليمان: عادي يعني مو شي مهم اقولج ياه , الربع يبون يسافرون و كلها سبوعين و راد
,شفيج جذي انفعلتي حسستيني أنج حبيبتي هههههههه
روان : ههه, وين بتروح؟!
سليمان: مصر
روان :تروح و ترجع بالسلامه , مضطره أسكره الحين وصلت البيت باي
سليمان : تعالي تعالي ما تبين ايبلج صاجات هههه
[جــــــــــــــــ,,,ـــــــــــــــك]
إنقطع الإتصال
روان ... غورقت عيونها ... حسستيني إنج حبيبتي !! ليش إنته ليما الحين ما حسيت بهالشي؟ !!!!!
مسحت كحلهـا اللي ساح , قفلت سيارتها و دشت البيت ...
حصه: تو الناس جان طولتي أكثر
روان: أستغفر الله
حصه: تستغفرين ريج , تعرفين ربج أنتي؟ راده تالي الليل أنتي وين و طريج ربج وين
روان : إلسان طويل و قلة أدب مالي خلقهم رجـــاءاً يعني ,حشمي نفسج و قصري حسج
حصه : والله محد قليل أدب غيرج , ما كو ريال يأدبج يعلمج السنع
ساره: شفيهـا اللي بتعلم شيخة البنات السنع
حصه: بس كملت دلي و ملي
ساره: هلا رونه أختي حبيبتي شخبارج يقولون القز حامي و تغمز حق إختها و تضحك
روان اللي صج ما كان لها خلق شي : أي قز واللي يعافيج وديت خالتي بيتهم و رديت
ساره : سمعتي حصه هانم , البنت وصلت خالتها ويت عندج مانع؟
حصه: و خالتج كلش ما عندها عيال ريايل ترس ثيابهم إيون ياخذونها
روان عطت نظره حق ساره اللي تكفين فكيني منها
ساره: والله يا حصيص إذا ريلج اللي اهوه أخوي موريج الويل وحاكرج بين 4 طوف و محرم عليج الطلعه
ماله داعي تطلعين حرتج علينا ..واي رون روحي روحي دارج نامي باجر وراج جامعه ,, غيرج يحلم بقعدة الصبح حق الجامعه.. مو عدل حصه هههههه
حصه عصبت و عطت سارة نظرة استحقار و صعدت فوق راحت شقتهــا ..
" لتوضيح شخصيات القصه ... روان فتاة جامعيه بأخر سنه لها ... و ساره إختها الأصغر منها بثالثه ثانوي ... حصه مرت أخوهم "
ساره تطالع إختها ...: شفيج روان أحد مزعلج ؟ خالتي ردت فجت موضوع ولدها معاج؟
روان , أنتي وين يا ساره و أنا وين : مافيني شي بس تعبانه منهد حيلي أبي أنام
ساره و أهيا مو مصدقه أختها : أها تصبحين على خير, الله يفكج من هالصيفي ...
صعدت روان دارها و دشت تاخذ لها شور .! أو بالأحرى تبجي تحت الشور !
3 سنين 3سنين يا سليمان من عمري معاك
مو راضي تحس إني أحبك , مو راضي تفهم أني أموت عليك
لي متى بنطر بعد لي متى بكون على أعصابي انطرك بس تهتم فيني
كل يوم أقول باجر يحن ! باجر يحس !
ليلة فالنتاين 2004
روان : سليمان باجر شعندك
سليمان: حاجز مع الربع سينما
روان: أاا..ممم
سليمان: شفيج تتمضمضين ههههه ,قولي حبيبتي شنو بخاطرج ؟
روان و طارت بالكلمه : حبيبتك ؟ :$
سليمان : منو؟!
روان : أنته قتلي حبيبتك
سليمان : أسف مو قصدي متعود على هالكلمه يا حبيبتي ,يا حبيبي
روان , بخيبة أمل مو قصدك !, يمكن مستحي , يمكن خاف من ردة فعلي..
سليمان : ألــــــــــــــــــو نمتي؟!
روان :سليمان أقدر اشوفك باجر
سليمان : قتلج بروح السينما باجر
روان : إي قبل ما تروح بشوفك 5 دقايق
سليمان : ليش شصاير شفيج ؟!
روان .. و حست بإهتمامه و حبت تخلي الموضوع مفاجأه : باجر تعرف
نامت و أهيا تفكر إباجر و شلون بتشوفه و ردت فعله !
... مرت عليها ليلتها ماتدري شلون ...
من الصبح و أهيا تحوس من محل تغليف هدايا لي محل ورود !
صارت الساعه اللي متفقه مع سليمان أنها تشوفه فيها
... تنطره بمواقف مارينا ! لمحت سيارته تحوس
على طول
روان : ألو سليمان
سليمان: هلا هلا رونه؟!
روان : شالإزعاج اللي عندك , معاك أحد !!!
سليمان : إيه الربع مو قتلج حاجزين سينما !
سمعت صوت واحد يقوله : هـــا سلوم الحب داقه , برر برر لها هههههه
سليمان : أي حب و اللي يعافيك أنا وي حُب
إيه روان شبغيتي داقه ؟!
روان و دموعها مو راضي توقف !! يعني مو ياي عشاني ! يعني انا مو حبيبته !!
وصكت الموبايل بويها و ما سمعت شنو كان يقول !!!
طلع سلمان ناسي انها متواعده معاه أصلا ,
و عقب فتره بررتـــله انه يمكن انحرج جدام ربعه و ما حب يفشل عمره
خصوصا انه اصلا ما صارحها بحبه , !
و لأنه اللي يحب ما يقدر يتجاهل ولا يصد و يبعد عن اللي يحبه
داست على قلبها و ظلت معاه بدون ما تقوله السبب الصجي اللي خلاها تبعد عنه الأيام اللي فاتت!
و أكيد بيوم بيتخلى عن هالخجل اللي ملازمه و يعترفلي بحبه !!!!
زادت بجي روان من عقب هالذكرى !! حست روحها وحده ساذجه
حست روحها وحده ناقصه حنان !!
تذكرت شلون قطت الهديه بالزباله !! و شلون لما سألتها ريم عن ردت فعله !
جذبت عليها .....! شلون تقولها انه ناسي انه متواعد معاي شلون تقولها انه جرحها و
أحرجهـااا !
للأسف مو قادره تصارح حتى نفسها انه ما يحبها ولا يفكر فيها
جذبت على نفسها جذبه و قاعده تعيشها !
و ردت غرقت بنوبة بجي ثانيه !!
صبـــاح يوم الأحد
الرطوبه مو طبيعيه بالكويت !
و الشمس حنانيه ...
ريم واقفه عند باب بيت روان و تدق هرن بصوت مزعـــــــــج!!
ريم و تطقطق على السكان و تغني و الإبتسامه شاقه ويهــا
ريم: ألو ,صباح الفل و الياسمين و الكادي و النعناع
روان : النعناع عاد , شعندج فازعه من صباح الله خير
ريم : يلا نزلي انا بره
روان : انا اقول منو مسبب قلق بفريجنا , شعندج مارتني اليوم
ريم: عشان أقولج السالفه على راحتي مالي خلق كل من مر قط أذونه عندنا
روان : و أنا اقول شالحنيه اللي نازله عليج
ريم : بتطولينها ؟! يلا نزلي صلختني الشمس
روان : نزلي ريوم مطوله ما سويت شعري
ريم :وين أنزل فشله , خلاص ناطرتج
روان: إسمللله أم فشله يلا كا ثواني و نازله
ريم :يلا اوكيك
و كملت ريم الحفله اللي كانت عندها بالسياره
:....خير إنشالله شعندج واقفه عند باب البيت من الصبح و تدقدقين هرنات ؟!
ريم: حصيص ليما الحينج إلسان طويل؟! ما قصه لج جاسم هههه
حصه : إحترمي نفسج , ماكو إحترام كلش ! عادي مو غريبه مدام رفيجة روان اكيد هذا اسلوبج و هذي اخلاقج
ريم: أقول حصه دشي البيت لا يشوفج جاسم , يقصبج ههههههههه
حصه : يا ماما يسمونها غيره زوجيه , جان ما تعرفينها ؟! ايه صح انتي ليما الحينج عانس ههههههههههههه
ريم : مطوله حضرتج ؟!! خلصيني لا تخربين مودي
و سكرت جامة السياره و حقرت حصه اللي عيزت تطق عل جامه تبيها تفجها .. بس ولا عل بال حاقرتهـــا
طلعت روان من البيت مستعيله و شافت حصه بدراعتها و شيلتها تطق الجامه على ريم .. و ريم تترقص بالسياره و حاقرتها
روان : ههههه حمدالله و الشكر
حصه : هالأشكــــال ما أبيها إبيتي فاهمتنـــي !!! ما أبي اشوفها موطوطه عند عتبت البيت
روان: لي صار بيت أبوج تعالي تحجي , بيتي تقول ... وخري ماما وراي جـــــــــــامعه
ريم لمحت روان ,, فجتلها الباب اللي كانت قافلته عن حصه
ريم : هلا بالزين كله هلا والله بصديقتي الصدوقه هلأ
روان : هلا حبيبتي هلأ
حصه : روان كل اللي إنقال عند جاسم ترى , و بقوله عن لبسج !! أنا أوريج هين والله أوريج ما أعديها لج
روان: نبي مجبوس دياي عل غدى أوكي حصه, هالله هالله بالطباخ
ريم :ههههههههههههه قويه قويه رووون
.و شخطت ريم بالسياره.....
.
دشت حصه البيت و أهيا مفوره شابه نــــار من تصرفات أخت ريلها و رفيجتها !!!!
"أو اللي كانوا بالأصح رفيجاتها بالثانويه !!"
حصه : أنا أوريكم أنا أأدبكم أنا لكم هين والله ما اطوفها
لين: ماما ابي ريوق
حصه : ذلفي انتي الثانيه خدامتكم و أنا مادري ,!!
ودزت بنتها بعصبيه و راحت شقتها
حصه: جاسم .. جاسم !!
جاسم .. قاعد يقرى قرأن ..
حصه: جاسم رد علي احاجيك أنـــا
جاسم : صدق الله العظيم ... نعم شبغيتي؟
حصه: شفت اللي سوته اختك توها و رفيجتها .. أستغفر الله
جاسم : شسوت شصاير؟!
حصه: مو سامع الهرن هاللي شايل الفريج و هالأغاني أعوذ بالله !
جاسم :و اختي شكو؟
حصه: رفيجة أختك حمدالله و الشكر داشه الفريج مطوله عل أغاني حدهم و لبس فاضح أستغفر الله
رحتلها قتلها أنه عيب عليج قصري عل صوت بغيتلها الهدايه ما بغيت شي منها ... ردت علي رد الله وكيلك ما بغيت إلا عمري
و ما كملت كلامي معاها إلا أختك طالعه و لابسه ذاك اللبس اللي الله لا يوريك .. استغفرالله و قطوا علي كلام يسم البدن يوم قعدت انصحهم و عايروني
اني مو جامعيه و انك طلعتني من الثانويه و انه ما عندي شهاده و حاكرني فالبيت
جاسم و اهوه معصب من كلام حصه : وين شفتي رفيجة روان؟
حصه: بالسكه شفيك توني قتلك
جاسم: شمطلعج السكه؟
حصه : هــااا؟ الحين انا اكلمك عن تصرفات اختك و رفيجتها تقولي شمطلعج السكه؟!
جاسم : أختي محد له كلمه عليها غير ابوي عندج خبر اتوقع ! و رفيجتها انا شكو فيها؟!
حصه : ابوك مسافر يعني انته ولي امرها , و بعدين شلون مالك شغل برفيجة أختك!! الطماطه الخايسه تخيس الطماطات يا جاسم
جاسم : أقول خلي عنج الطماط الخايس و روحي جابلي جدرج ابركلج ! و باب السكه ابيج تعتبنه مره ثانيه بدون شوري
والله والله يا حصه ما يصيرلج طيب !
حصه: على أمرك
جاسم: سويلنا مجبوس دياي عل غدا !
بسيارة ريم
ريم: هههههه والله هالحصه نكته مسكينه مو عارفه شتسوي بروحها
روان : هههه مسكينه عاد كاسره خاطري
ريم : تكفين هذي تكسر الخاطر , تقولي عانس و أنا بريعان شبابي
روان : هههههه حلفي قالتلج جذي
ريم :والله , ما تدري عن عزيزاني فديته أنا والله
روان : هاا هـــا فيها عزيزاني و فديته ها شالطاري شصار
ريم و ترمش بعيونها بخجل
روان : ايه على هالنظره أمس صكيتي موبايلج عدل
ريم : ههههه والله والله والله صكيته بس بعدين علفير حن قلبي و فجيته قلت خل اشوف
جان دازلي مسج و إلا واصلني miss call
روان : إيـــه والنتيجه؟!
ريم: 5 مسجات و فوق العشر مسكولات
روان :والله انتي مال طق على هالبجي اللي ذبحتي عمرج امس
ريم : ويه يحليلج عبالج ضيعت دموعي هباءا منثورا لي الساعه 8 الصبح و أهوه يراضي فيني و زين اني رضيت
روان : مادري شلاقيه بهالحلي والله
ريم: رووووووون حرام عليج برونزاج هذا
روان : قولي هالمره على شنو متهاوشين
ريم: تخيلي يقولي بسافر مع ربعي !!!!! اللي يقولها جنه ترى مو قاعد اشاورج انه بس اعطيج خبر
روان و راح بالها مع هاللي سافر عنها و جرحها للمره الألف قبل ما يروح
ريم : الله وكيلج يقولي يبا المطار ماني شام ريحته مدام يزعلج .. ألوو روينه وين وصلتي
روان : ها لا بس قاعده افكر بأبوي طول بسفرته
ريم: إيه الله يعينه و يرجعه لج بالسلامه
... ناس مستعده تضحي بوناستها عشان خاطر اللي تحبهم , و ناس مو راضين يحسون باللي ميتين عليهم و عاشقينهم
خالد: أبي أروح الشاليه , والله ميت أبي بحر ! حرام عليكم أنا مو مال حكره بالبيت
عطوني ميدار عطوني جت سكي !
ابي زفره ابي شمس ابي ملوحه
أم خالد : عتوي عتوي مو ولد تبي زفره؟! ولا يهمك نسويلك زبيديه
خالد: يما والله قوليلي شحقه مخليتني اهد الشاليه و ايي الديره , لا شغله ولا مشغله ما غير مجابلج
دامج مشتاقتلي تعالي قعدي معاي بالشاليه
ام خالد: بغيتك بسالفه , بس ولدي اعرفك مو كفو نعمه !
خالد: هااا يما بدينا عاد
ام خالد: إيــه بدينا ! عيل في احد يهد اهله و يجابل الشاليه , لا دراسه ولا بطيخ
خالد: غصب اخذ صيفي يعني خليني اريح هالمره
ام خالد : شوف بنت خالتك شزينها و الله تداوم بهالصيفي ما قالت اريح ولا خرابيطك
خالد: احنا وين و روان وين , يما هذي تاكل الكتب مو تقراهم
ام خالد: سملله عليها من عينك , اذكر ربك عليها
خالد :الحين منو اللي ولدج انا و الا اهيا؟!
ام خالد: انته وليدي و اهيا انشالله مرت وليدي
خالد: خير خير ما سمعت عيديها واللي يعافيج ! و أنا اقول مو لله منزلتني من الشاليه
يما جم مره اقولج توني صغير انا جامعه ما خلصتها ! ثانيا بنت خالتي غسلي ايدج اخذها
ثالثا انا ماني ماخذ الا على ذوقي و مزاجي
ام خالد : على كيفك ؟! شوف منو اللي بتروح تخطبلك !
خالد: انا رايح الشاليه , بس لاعت جبدي !!!
ام خالد و بعصبيه ! دقت على بوخالد و قالتله يخلي حارس الشاليه يقفله و يروح شاليه يرانهم ! عشان ما يدخله خالد!
بوخالد : ليش ليش شمسوي هالمره بعد
ام خالد : شاليه مابيه يطبه من اليوم و رايح بروحه !
بوخالد : إنزين إنزين خلاص
نهاية الجزء الأول
أتمنى ألقى ردود عشان أتشجع أكملهــا ;p
9 comments:
أول رد :D
حدي اندمجت مع القصة دمها خفيف، والاسلوب بسيط ومشوّق :)
حسيت الكلام يصلح مسلسل برمضان ;P~
بانتظار الجزء الثاني
:*
أشتقت حق طلتج بالبلوق ;p
الحمدالله يعني أصلح أكتب ;D:D
إنشالله أنزل البارت الياي قريبــا
" بنافس فجر السعيد ;p"
AMBEEEEEEEEEEH
حدي حدي حبيتها و إندمجت ،
شكو يخلص الجزء الأول =\ !
:
:
محد كسر خاطري غير حصوه LOOOOOOL
عاد تصدقين رفيجاتي إلي صادفوني و إسمائهم "حصة" ثنيتنهم
تزوجوا مبجر @@ !
الله يتمم عليهم ،
:
:
روان سالفتها تقطع القلب =\\ !
قعدت أبجي معاها لول ;(
يعوِّر الشعور حده !
بس "عتوي" موتني من الضحك التعليق !
روروه إبداااع حدها !
\
إممم حبيت حركت إنج ماتكتبين إسم الشخصيه و نكتشفه مع الحوار ..
أنا وصلني الإيميل بس مافتح معاي اللنك =\ !
حدي ناطره الجز الثاني
;**
reDon,
redOn
LOOL!
شجعتيني عدل يا شقول ;$
شكرا شكرا ;D
عاد تصدقين حابه حصه LOL!
خلاص تابعيها هنــي عيل ;D
thanx wayed sweety 3ltshjee3
ابداع روعة تشويق
حسافة خلص الجزء الأول بسرعه
انا بأنتظار الجزء الثاني على احر من الجمر
تقبلي مروري ,وان شاء الله يكون بينها تواصل :)
اوووو يعطيج العافية حبيبتي
يالله كملي متابعينج
^_^
انتي وينج ترى فاقدتج؟
تشوق القصه... يالله تحمست حق المقطع الثاني
وااااااااااااقعيه تونس
بس بطت جبدي مرررررررررت الاخو حدها
قمه الاندمااج
bhr.gadsawiya
تسلمن حبيبتي على هالمرور الحلو
أسعدني تواجدج و تشجيعج
و إنشالله دقايق و بينزل البارت الثاني ..
:))
.
.
.
sUper icOunz
هلا والله أيكونز تو ما نور البلوق ;p
ما تفقدين غالي انشالله ;*
خلج متابعه خوش روايه يقولون ;pP~
.
.
.
brown suger
thanx ;*
ثواني و ينزل البارت اليديد
.
.
.
laywer
إعجبتـــج يعني؟;D
تابعي الأحداث و بتبط جبدج أكثر ;p~
thanx 7bebte 3lmrOr ;*
Post a Comment