●◦● ~ [ليــــت اللي باقـــي من عُمــري ويـــاك]~●◦●

●◦● الجزء الخامس ●◦●

بالفيحــــا في منزل ريم ..
فرح: واي ريوم حـــنه و رنه ! لبسوا و خلصوا!! و رفيجتج ليما الحينها ما شرفت !
ريم و لاهيه تدز مسج حق عزيز تتشره عليه و تبينله انها زعلانه : الحين تيــي نطري شفيج ,
دخل ابو محمد(بو ريم) البيت لقى بناته فرح, أسماء, ريم ... لابسين و متكشخين
بو محمد: خير إنشالله على وين ؟!
أسماء: هلا بو محمد هلا بالغالي,
فرح: ماكو بنطلع مع روان و ساره
بو محمد : إيـــه يحليلهم بنات بوجاسم خوش بنيات ..
[..يحلمـــون اللي فيك يفكرون ياخذونك أنته مني والله لو يتجنون..]
دق موبايل ريم و كان عزيز اللي داق .. توهقت ما تبي ترد عليه جدام ابوهـا .. صكته بويهه!
بو محمد: علامج ما تردين؟!
ريم: لا يبـا هذا مسج
بومحمد: رنة مسج هالطول ... و قام عنهم
فرح: ريوم ترقيعتج بمخباتج على طول جذبتي
ريم : هههه شسوي توهقت
أسماء: انتي لو الله يفكج من زيزو الفقر انتي بخير ...
اسماء كانت معارضه فكرة انه اختها تكلم واحد.... كانت تخاف من هالعلاقات
بس ما كان بيدها شي غير انها تنبههاا, و بحكم انه ريم اكبرهم و اسماء اصغر وحده فـ ما كان لها موقف قوي !
ريم: اففففف ما نخلص اسماء ؟!
اسماء: انزين بصك حلجي
فرح و تغير السالفه ما تبي تخترب الطلعه:اقوول ريوم رفيجتج وينهـا ما صارت حدي يعت!
ريـم : إنزين الحين أدق عليهـا
خذت موبايلهـا لقت واصلها مسج من عزيز
""ريــم حبيبي أنتي , ما يسوى تزعلين على سالفه تافهه , شنو يعني واحد خطبج عادي
عصبت شنو يلعب علي و إلا شنو؟! انا اوريك هيــن يا عزيز بحقرك اكثر ! دق و شوف منو الغبيه اللي بترد عليــك بحرقلك أعصابك مثل ما حرقتلي أعصابي!
دزتله مسج
" إيــه صح عاديي .. و أسفــه مو فاضيه ارد عليك , بطلع مع رفيجاتي "
تدري انه طفارته اذا طلعت بدون ما تقوله وين بتروح!
و دقت على روان
....
روان في بيتهم حاضنه ابوهــا و تبجي
عيز منها بو جاسم يبي يهديهــا بس مو قادر! خلاها على راحتها تبجي تطلع اللي بداخلها ...
خالد طلع من البيــت ما قدر يتحمل منظر روان و اهيــا تبجي قطعت قلبه! ما يبي يحس بالضعف تجاهها ! ما يبي يغير مخططاته! لأ يا خالد حتى لو إنك تحبهـا!
حتى لو قاعده تتعذب تذكر انها ما تبي قربك! حتى لو تبجي ترى تبي غيرك! قــَو قلبك غصبــا عليهـا بتاخذها !
..طلع من بيت بوجاسم بس مو قادر يخلي روان توخر لحظه عن باله !

حصه بنفسيه : بس روان شفيج ياهل؟!
جاسم ساكت يطالع روان , قوة علاقتج يا روان نفس علاقتي بأمي الله يرحمها ! حظنها كان الملجأ الآمن حق دموعي .. الله يرحمج ...

[..لبيــه ياللي وحدك إن قلت لبيه يذبحني لبيهك و يذبحني الصوت ....]

ساره: روينــه موبايلج
روان تمسح دموعها و تاخذ موبايلها من جنطتها : ألو
ريم إخترعت من صوت روان: رواااااااان شفيج؟!
روان تضحك بدموعهـا: ابوي رد ريـــوم
ريم خذت نفس عميق: الله ياخذ بليسج وقفتي قلبي! الحمدالله على سلامته
روان تضحك على رفيجتها و خوفها عليها : الله يسلمج
ريم: يعني نكنسل الطلعه لي يوم ثاني
روان: ويـــــــــــي نسيتج
ريم : نساج الموت , المهم خلج مع ابوج ادري مشتاقتله و سلمي عليه
روان :هاج انتي سلمي عليه
عطت روان ابوها الموبايل
بو جاسم كان يعتبر ريم و حصه مثل بناته ! كانوا رفيجات روان من عمر
بوجاسم: هلا بالريـم هلا بنيتي
ريم: هلا عمي , الحمدالله على السلامه ! نورت الكويت ..
بوجاسم: يسلمج يبـا , سلمي على الوالد خل يمرنـا الدوانيه شدعوه
ريم: إنشالله عمي يوصل , خلاص سلم على روان و قولها تشوف يوم ثاني و تقولي
بوجاسم: حق شنو يوم ثاني؟!
ريم: حق الطلعه..
بوجاسم : لااااا ولي يعافيج ريم اخذيهم طلعوا .. تعبان من الطياره بنـام و رفيجاتج مو مقصرين كل وحده لامتني من صوب ههههههه
ريم : ههههه ولا يهمك عمي ما اردهم البيت إلا لمـا انته تقولي وين بناتي
بوجاسم يضحك: يلا فمان الله بنيتي ... و عطى الموبايل حق روان
روان : الوو ,
ريم: الو الو , سمعي روينه خلاص عمي وصاني ما اردكم إلا الفير خلوه يرتاح
روان تضحك و تطالع ابوها : إيــه والله بوجاسم يبي الفكه منا مادري شعنده!
ساره : لا تحاتين روون نطلع و نرجع قبل ما يقعد ما راح يفتك منــا
روان : الو ريوم خلاص تجهزوا ثواني و أنـا عندكم ,
ريم مستانسه على وناسة رفيجتها: خلاص اوكي ناطرينج باي !


سكرت ريم من روان و شافت 5

miss calls
من عزيز ... و داز مسجات
" منو قاعده تحاجين؟! ردي علي"
"لهدرجه هالشخص مهم؟!"
" حطي إبالج مو على كيفج تطلعين و تدخلين , إن شفتج طالعه يا ويلج"
" ريم والله أحبج , شفيج علي ؟"

ريم تقرى و تضحك قلعتك قلعتك ! بس عور قلبها مهما كان تموت فيه و تحبه !
بس كانت تبي تلعب بأعصابه شوي, ما تبي يعيد حركاته معاها و تعلمه انه مثل ما حبها غيره الف ....

أم ريم و بو ريم يدخلون الصاله , توهم متغديــن ...
بو ريم : والله يا بنات ما عندكم سالفة تضيعون هالطباخ السنع و تاكلون من المطاعم
ريــم : شنسوي يبـا نبي نرفــهه عن أنفسنـا, ايه صج يُبـا يسلم عليك بو جاسم يقولك مره الدوانيه
بو ريم: الله يسلمه , متى رجع من السفر؟!
ريم: توه راد من السفر..
بو ريم: و شلون فحوصاته اللي سواهم؟!
ريم: والله مادري , اسأل روان بعد شوي ..
ام ريم: ريوم و أنتي طالعه مري دار العوضي اخذيلج نفنوف سنع حق الخميس
ريم و تذكرت عزيز و بروده: إنشالله ...
أسماء: شنو شالسالفه شعندكم الخميس؟!
فرح: إذا عرس من الحين ترى ماني رايحه
ام ريم: على طول حتى السالفه ما عرفتيها و منتي رايحه , الخميس ناس بيون يخطبون ريم
فرح و اسماء منصدمين انه ريم موافقه انها تتزهب حق الخطبه ! العاده تعصب , شسالفه ؟! ماتبي عزيز! تساؤلات وايد مرت إبالهم

[..يحلمـــون اللي فيك يفكرون ياخذونك أنته مني والله لو يتجنون..]
ريم و قامت تاخذ جنطتها : يلا كاهي روان
ريم : ألو روان
روان بوناسه : يلا يا صبــــايا انــا بره
ريم : اوكي يا صبيه الحين نطلعلج, باي باي...

راحوا اسماء و فرح و ريــم يبون يركبون السياره! قبل ما يركبون ..
أسماء: شسالفة خطيب الغفله؟!
ريم: بعدين اقولج السالفه , ساره بالسياره لحد إيــب طاري عزيز ما تدري عنه ترى
فرح و أهيا تفتح الباب: هــــــــــــــاي بنات مشتاقتلكم
روان : تشتاقلج العافيه قلبي
ساره: والله انا ما عندي سياره مدام مشتاقتلي مريني ما اقول لأ حق طلعه
فرح: ههه من عيوني خلاص
روان : شعندهم اسومه و ريم ما ركبوا!....
دقت لهم هرن
ريم تركب جدام: وااااي إنزين إنزين ادري ما تتحملين بُعدي
روان : ويهج ويهج بس حرام هالشقره اللي معاج جوتها الشمس
أسمـاء كانت ملامحها ناعمه بشكل برئ شعر أشقر و عيون خضر محد كان يصدق انها خليجيه: ههه ايه والله , شلونكم بنات
روان: شغل الذرابه كل شوي وحده مسلمه , هنود مو بنات هههههه
ريم و مستغربه من التغير المفاجئ بنفسية رفيجتها : شتبيـــن خواتي ذربات طالعين علي
روان : إيـــه واضح, هــا وين تبون تروحون؟!
فرح: أي مكان بس مو الأفنيوز لاعت جبودنـا منه
روان : خلاص و لا يهمج احلى مطعم حق احلى فرح

سيارة روان كانت جاغوار
S-TYPE
فصاير الوضع زحمة بنات بسياره , و كلهم كانوا ستايل و حلوات ...
فــ ساتـــول شباب لاحقينهم من الفيحــا لي البحر ..

اسماء: واي قطيعه لزقه ما يفجون
روان و بغير عادتها مو مهتمه : خل يولون شعلينا منهم ما سوينا شي غلط احنا
و طولت على الأغانــــي
[يا التــــــاكسي خذني لهـا يا التاكسي و بسكتك خلني أمر أخذ عطر رومنسي....]
البنات قاموا يصرخون عليها تغير الأغنيه

ساره: أمبيه اختي ذوقهــا تهلق شفيج منو تماشين
فرح: هههه ما كو إلا أختي اللي مخربتهـا
و ظلوا سوالف و ضحــك....
ليمـــا وصولوا لي مطعم نينو
فرح تصارخ : يوعـــانه يوعانه!
روان : هههههه نطري خل نسفط
سفطوا شوي بعيد و قعدوا يمشون لي المطعم ...
و طبعا الشباب اللي كانوا لا حقينهم ما خلوهم اللي سفط و نزل وراهم
و اللي مر قطله جم كلمه و راح!
.....
روان ترد على واحد: إذلــــف بس لوعت جبودنـا
....: و إذا ما ذلفت
روان تحقره و تمشي سريـع , بس كانت لابسه كعب فـ مو قادره تمشي حيل
....: حلـــوه و مغروره يحقلج يبـــا
...: شدعوه عطينا وي , لهدرجه يوعانه
دخلوا المطعم , ريم : واااي غير سالفه علج مو صبيان شدعوه جذي لازقين
روان و بغير عادتها: يشوفون كل هالزين وين يقدرون يمسكون روحهم
ساره إستغربت من كلام إختها , العاده اهيا اكثر وحده تعصب على المغازلجيه
ما إهتموا حق الشباب و راحوا قعدوا بطاوله ...
روان حاسه روحها ياهل , تبي تسوي أشياء عمرها ما سوتهم ! تحس روحها قاعده تعيش أخر لحظات عمرها
ماتبي تخربهم بالبجي و التفكير على شي ليما الحين ما صار!
نادت روان الويترس و قعدت تساسره ..
و كلهم مستغربين شعندها
روان: واااي شتبون حرام يعني , حجوه بيني و بين المصري
ريم: والله مادري شفيج اليوم , فيوزاتج ضاربه بزوود
طلبوا غداهم و سوالف و ضحك ..
ريم نادت الويترس انها تبي الفاتوره : يلا انا اللي عازمتكم
روان و قامته ضحكتهـا : على راحتج , يا حلو أكل البلاش ههههه
ريم و مو منتبهه على الحوسه اللي وراهـا
و إلا الويترس كلهم يايين و معاهم كيكه و يغنون
happy birthday song!
ريم لفت على البنات تبي تعرف منو عيدميلاده اليوم
شافت روان تأشر حق الويترس انه عيدميلاد ريم!
ريم: يـــا شقول شكـــــــو عيدميلادي اصلا شهر 1
روان و ميتـه ضحك: ههههههه مادري طق إبالي كيكة
birthday
ريم و ويههـا محمر عيزت تسكت الفلبن مو راضين يسكتون :
thanx thanx يلا gO gOOOO
البنات ميتيــن ضحك على ريم
ريم و تخز روان : أنا اوريج يا الخايسه ... و تحذف عليها الفاتوره ... دفعي اقول اليوم عيدميلادي هههه
روان و تضحك: اشوف صدقتي ههه
ريم وصلها مسج ..
" شالحركــات البايخه , يعني غصب تبين تلفتين النظر!!!!! , طلعي من المطعم الحيـــن"
تلفتت ريم و شافت عزيز عند الباب و معصب الشرار يتطاير من عيونه
ويهها اخترع و الكل لاحظ هالشي , كانت تبي تحقره بس خافت يفضحها و يفشلها جدام الناس و خصوصا انه ساره ما تدري عنه!
روان تساسر ريم: شفيج اختبصتي جذي! من منو المسج
ريم و توري روان المسج: مادري شلون درى اني هنـي
روان: دزيله مسج قوليله اني يايه مع روان ما عندي سياره ارد فيها
دزت ريم حق عزيز الكلام اللي قالته روان , ريم و أهيا تطالع ردت فعل عزيز المعصب شافته يقرى المسج و يرد يكتب

.... بهالوقت واحد من الشباب اللي كانوا لاحقينهـم قرب من ريـم لزق بكرسيهـا
....: كل سنه و الحلوه بخير , لو أدري انه عيدميلادج جان قمنا بالواجب
ريم عينها على عزيز اللي ليما الحين ما شاف الصبي ولاهي مع المسج
...: بس تدرين اخذي رقمي و اقوم بالواجب عدل معاج
ريم وعينها على عزيز لا يشوف الصبي: لو سمحت وخر و إحترم نفسك
عزيز رفع راسه شاف ريم قاعده تحاجي الصبي و تطالعه!!!
شقصدهــا يعني تبي توريني اني اقدر العب و اكلم غيرك جدامك!!

عزيز يــــــن قامت شياطينه! و قام يمشي سريــع لي جهة الطاوله
روان إنتبهت على عزيز ! حبت تنقذ رفيجتها من الموقف ...
قامت بسرعه: بروح الحمام و برجع
روان و وصلت حق عزيز قبل ما يوصل طاولتهم
روان: عزيز وقف شوي
عزيز و بصرااخ: شنو اوقف انا اوقف وإلا رفيجتج والمصخره اللي قاعده تسويهها جدام الله و خلقه
روان و تحاول تهدي عزيز: عزيز لا تصارخ انا افهمك كل شي اسمعني انته!
عزيز و مو راضي يهده و يبي يروح لي الطاوله: رواان وخري لو سمحتي , السالفه بيني و بين التبن ريم!!!!
روان و تمسك عزيز و تسحبه معاها: قتلك خلني افهمك كل شي ! يا عزيــــــز اصبر خل اتحجى و انته احكم!
طلعت روان و عزيز من المطعم ..وقفت معاه صوب سيارته
روان: عزيز شفيك ريم تحبك متخيل يعني انها بتفكر تخونك وإلا تلعب؟!!
عزيز: و حركات الاستهبال اللي توه! يعني تلفت النظر بهاللبس الخايس اللي لابسته ! و شسالفة العيدميلاد! مو عشان كوكش الشباب اللي قاعدين
روان و حست بتأنيب الضمير: عزيز العيدميلاد انه اللي سويته لها اسفه! بس والله قاعدين بإحترمنا حبيت اونس البنات!
و الشباب ترس الكويت يعني ما يــت على هالمطعم!
عزيز و بدى يهدى: و الزفت اللي قاعده تكلمه!!
روان: واحد ما يستحي قاعد يتحرش و زفته!
عزيز و هدى تقريبــا: يا روان مادري شفيها علي! ادق ما ترد, مسجاتي تحقرهم !تقولي بطلع و تدري فيني ما احبها تطلع بدون تقولي وين بتروح !
روان و كسر خاطرها ..من قلبه يحب: طول بالك عزيز مو قصدها ما ترد عليك يمكن ابوها و إلا امها يمها
عزيز: روان متخيله اني لاحقكم من البيت بشوف وين بتروحون! حطي نفسج مكاني والله قهرتني!
روان و عورها قلبه عليه و حبت انها تريح عزيز: تبي تعرف ليش اهيا قاعده تتعامل معاك جذي؟!
عزيز و بقلة حيله: على إيديج
روان : منك! انته السبب حسستها انك ما تبيها , تقولك واحد خاطبني ترد عليها ببرود و تقولها اذا زين وافقي؟! هذا بـ الله حجي واحد يحب؟!
عزيز بإبتسامه حزينه : أنا
روان و مو فاهمه: شنو؟!
عزيز: أنا اللي بخطبها باجر
روان و بفرحــــه :صــــــــــــــــج حرااام عليك شسويت فيهاا والله بتيـن لي عرفت السالفه
عزيز و ارتاح : والله يا روان عشانها حبيت أفاجئهاا
روان و مستانسه عشان رفيجتها: خلاااص الحين روح و أنا أقولها اللي قلته
عزيز: لا ماني متحرك ليما تطلعون من المطعم
روان : عزيز بنطلع والله الحين , بس روح إنته لا تشوفك اختي !
.. روان واقفه تكلم عزيز متناسيه الناس الرايحه و الراده! كل اللي فكرت فيه حرام هالحب و هالعلاقه الحلوه بين ريم و عزيز يصير فيها شي بسبت غبائي!
.........


خالد من طلع من بيت بوجاسم و اهوه مو عارف وين يرووح!
يسمع صوتها تبجي! يشوف دموعها! لهدرجـــه يا روان ما تبيني....
قعد يتمشى بالسياره و مشغل أغاني و ساهي بأفكــاره ..

[أبسألك هو أنا أستاهلك..
أستاهل الدمع اللي جرح وجنتك
أستاهل إني أعشقك ...]

....
كان الحزن مسيطر على ملامحه بشكل غريب,
لمح سياره سافطه بنينو .. ياربي جنها سيارة روان ..
شفيك خالد ماكو احد عنده جاغوار إلا روان
بس ماكو وايد لونهم شامباين!
خالد ريح اعصابك شوي و إنساهـا ,
خل اقرب صوب السياره بس بتأكد ....

راح خالد صوب السيارة , و طلعت سيارة روان
لوحة السياره , فراشة الشوارفسكي ..
لف يطالع المطعم , لمح وحده واقفه قريب من واحد و تكلمه شكلهم يحبون بعض!
حسدهم على هالحب .. ياريت روان تبادلني ربع اللي عندكم....
البنت كانت معطيته ظهرها لمح بس الشاب ....
حرك سيارته خالد ما يبي ينزل و يشوفهها بالمطعم أكيد يايه مع بوجاسم ...
بعد عن المطعم لمح بالمنظره ويـــه البنيــــه!!!!

قاعده تضحك ! فاله شعرها و يطير بجهة الشاب!
رواااااااان ....!!!!! أشكره جذي و صلت الجرأه عندج!!!

لـــف فوق تحت و رجع عند السياره اللي كانت واقفه عندها روان مع عزيـــز!
نزل بسرعه مو طبيعيه سحبهـا من شعرهــا و حذفها بسيارته و دااااااااااااااااس

عزيز وقف منصدم من اللي شافه ! أكيد هذا أخوهـا و بحكم إنه ما يعرف روان عدل .. فما تصرف ولا سوى شي!
أتصل عزيز على ريم بسرعه
عزيز: ريووووم تعالي بره بسرعه
ريم وتتكلم بصوت واطي: والله ما اعرف الصبي
عزيز: مو هذي السالفه ! رفيجتج روان أخوها شافها قاعده تكلمني بره
ريم بصوت عالي: أخووووهــــا
عزيز: تعالي انتي بره خلصيني!
قامت ريم من مكانها بتطلع حق عزيز
ساره بخوف: شصاير ريم شالسالفه!
ريم : ثواني وراجعه
ساره و مو متطمنه من اللي قاعد يصير!





بإيرلندا
محمد قاعد بنفس الكافيه اللي شاف فيه منار ...
فراس و شباب ربعهم دخلو الكافيه
فراس مــيت ضحك: ياخي اعتق نفسك بس يعني جم بيصرلك على هالحاله
محمد وبنفسيه:مو شغللك
فهد: يعني ما تعبت من النطره ليمتي بتنطر
محمد: مو شغلكم , بعدين محد شكالكم الحال ,عاجبني الوضع جذي
حمود يتنحنح: فراسو ما عرفتنا على الشاب الوسيم
فراس و يتذكر صاحبه : إيـــــي محمد هذا حمود صاحبي يدرس هني طب
محمد بغير إهتمام : هلا والله حمود ..

[.. خلاص يا مغرم حلوك صار مــر , لا لا تجيني تعتذر...]
حمود و يقوم من مكانه: عن إذنكم ...
راح بعيد يتكلم بالموبايل ..

محمد: شحقه يايب الخمه معاك هني , قتلك بقعد أنطرها بروحي
فراس: كافييه أبوك اهوه و انا مادري ,

حمود رجع الطاوله : يلا شباب انا استأذن , اشوفكم مره ثانيه إنشالله
فراس: أفــا حمود ما شبعنا منك إقعد يا أخي شورااك
حمود: الأهل والله يبوني
فراس: أهلك هنــي؟!
حمود مستغرب من سؤال فراس: إيــه هني, ليش عسى ماشر؟!
فراس:لا ماشر, بس يعني شقتك كلها شباب وين مقعد اهلك
حمود : اقول لا تكثر هــا .. يلا شباب اشوفكم على خير
و طلع من الكافيه ..
محمد: أنت ما تستحي تكلمه عن أهله
فراس: قاعد أقط نغزات أبيه يعزمنا على مجبوس مطبق اي شي , لاعت جبدي من اكل المطاعم
فهد:اللي يسمعك يقول صايرلك سنه ما جنهم كلهم سبوع
فراس: أنته شعليك انا واحد بسرعه استاحش من الغربه , أوووله على طباخ البيت انت شكو
محمد حاقرهم و مو ملقيهم وي .. سرحان بباب الكافيه ينطر منار بأي لحظه تدش





بسيارة خالد كــان دايس بسرعه جنونيه .. و روان قاعده يمه خايفه و تبجي
خالد بعصبيه: تبجين؟!!! لهدرجه وصلت الحقاره فيج! جدام الرايح و الراد مواعده
روان و تبجي: والله مو مواعده والله طالعه مع البنات
خالد يصارخ عليها: الجلب اللي كنتي واقفه معاه منـــو؟!!! مو سليمان حبيب القلب؟!!!!!!
روان و تبجي بصوت عالي: والله لأأأأ والله
خالد و يمجعها من شعرها: لاا تحلفين !!! شفتج بعيوني واقفه معاااه
روان تبجي مو عارفه شتقول , :....
خالد: طبعــاا ما عندج شي تقولينه! .... و يطق عل سكان حيـــل
روان بخوف: خالد وين بتوديني ,
خالد: الحين بس صرتي خايفه على روحج؟!
روان تطالعه بألم :... خالد والله انته مو فاهم!
خالد بصراخ: مووو انا حمار ما افهم فهميني انسه روااان , يعني اشوفج واقفه مع واحد و قبلها جاكج تكلمين واحد! شنو اللي بقى و ما فهمته
روان فقدت الأمل مو عارفه شتقول: اصلا هذا مو سليمان
خالد: لااااا والله بعددد اكرم و انعم ... جم واحد تعرف روان بنت خالتي الشريفه! وين ابوج يسمع الحجي
روان قعدت تبجي تبجي بصووت عالي و بالغصب طلعت منها كلمه : ......البنــات
خالد مو فاهم شتقول: اي بنات شنو؟!
روان تشاهق: سااره إختــي... و ريم و خواتهااا
خالد ساكت يطالعها :.....
روان و تبي تطلع روحها من اللي فيه الكل يعرف خالد و حالات ينونه: اانا موديتهم المطعم
خالد ساكت و يدوس بالسياره اكثر
روان و تتقضب بالباب: تكفى خالد ردني المطعم خل ارجع البنات بيتهم
خالد ساكت ولا لف عليها...
روان و تبجي حيـــل: تكفــــى خالد والله !! و سوو اللي تبيـه بس لا تفضحني جدامهم!!
خالد بصوووت عالي: خايــــفه من الفضيحه؟!!!!! هذا اللي هامج كلام البنات؟!!!!
روان و تبجي حيــــل: ابوس ايديك رجعني تكفى...
خالد مسكها حيل من شعرهــا : والله يا روان عشان ابوج و إلا جان ذبحتج ومحد بيلومني! حطي إبالج اللي سويته هذا ولا شيي! ... و دزها بعيد عنه






ريم واقفه مع عزيز عند باب المطعم:انته متأكد أخوهااا؟!
عزيز: مادري ريم واحد يصير لهاا .. بس شافته ماتت من الخرعه و ما سوت شي اللي قاعد يطقها و ركبت السياره معاه عادي
ريم و تأكدت انه خالد: عنده رنج برتقالي؟!
عزيز: إيــه
ريم تطق على راسها : لا حول ولا قوته إلا بالله!
عزيز: منو هذا ؟!
ريم: عزيز إنته روح خلاص , مو زين يرجع و يشوفك
عزيز: و منو بيرجعكم البيت؟! إذا تبين اخذي سيارتي..
ريم : لااا خلاص ندبرها اذا ما ردت عقب نص ساعه , سويجها بالجنطه ما خذته, أنا اسوق سيارتها ..
عزيز: خلاص حبيبي ديري بالج على روحج..
ريم: لا تشيل هم .. ...
ركب سيارته عزيز و إبتعد عن المطعم و عن المكان اللي واقفه فيه ريم....


ريم دشت المطعم ما تبي تحسس البنات انه فيه شي...
ساره و مخترعه من شكل ريم: شفيج ريم وين روان؟!
ريم: روون شافت رفيجتها بره و قالتلي بروح معاها نتمشى شوي بالسياره تبي تقولها سالفه
ساره: شنو ماكو شغل؟؟ و ليش تركب مع البنيه وهاده جنطتها و موبايلها؟! و شكو يعني جان إنزلت البنيه
ريم: إيــه مو هالبنيه ما تعرفكم حدها استحت .. و بعدين خمس دقايق و راده فشله توقف بنص الشارع تسلم عليها
ساره و مو مقتنعه من ولا كلمه من اللي تسمعه: مادري
فرح حست انه الموضوع فيه إنه خصوصا انها شافت عزيز: واااي شفيكم خلاص الحين ترجع لا تخربون طلعتنـا .. قصولنا من الكيكه شدعوه بنذوق
......



وصل خالد عند باب المطعم سفط و نزل فج الباب و سحب روان من شعرها
خالد: نزلي روحي نادي رفيجاتج قطيهم بيتهم و سيده روحي البيت
روان و تمسح دموعها و تعدل شعرها: إنشالله
خالد : راح الحقج ليما توصلين البيت فلاا تتشيطيرين علي!
روان و تبجي : إنشالله
راحت دشت المطعم ...
ريم من شافت رفيجتهااا قامت لها لمتها وساسرتها
ريم: قتلهم انج رحتي مع وحده من رفيجاتنا شفتيها بره
روان ساكته ما ترد :...
خذت اغراضها و قعدت تدور السويج بالجنطه..
ساره مخترعه: روان شصار؟!
روان تطالعها بنظره غريبه: ما صار شي ! يلا بنات تعبانه شوي خل نرجع ..
قاموا البنات من دون ولا كلمه و ركبوا السياره ...



خالد لاحق روان و معصب على السيايير اللي تلحقهم!
خالد يدز مسج حق روان
" شكو دخلتي شارع الحب"
روان متسنده بيدها على جامة السياره ...دزت مسج...
" بيت رفيجاتي بالفيحـا "
خالد قرب من سيارتهاا و يخزها
ساره: وي هذا خالد ولد خالتي نوريه ... ساره تضحكله
روان ساكته ما علقت :....
خالد شاف صبيان قاعدين يأذون روان .. قرب من سيارة الشباب و لزق بالسياره حيل و قام يتركلهم ليما وخروا
ساره تضحك: ههه يحليله ولد الخاله طلع يغار إحم إحم
فرح و موعارفه بالسالفه: والله مملوح ولد خالتكم
ساره: لا تسمعج روان تذبحج ههه
فرح مستغربه : ليش إنشالله؟!
ساره : بعد ما ترضى على زوج المستقبل ...
روان تطالع ساره من الجامه: من قال
ساره: أدري انا اصلا يوم يــا ذاك اليوم بالدوانيه عبالج مادري
...محد كان يدري بعلاقة روان بسليمان إلا ريم ...
أسماء : بالمبارك زيـــن بتتزوجون يميع أنتي و ريــوم
ريم بنفسيه : فال الله ولا فالج
روان و تذكرت اللي قاله عزيز .. قربت من ريم تساسرها: ترى عزيز اللي بيخطبج باجر
ريم و تشهق بصوت عالي: جذاااااااااااابه من قال
روان تطالع رفيجتها بنظره حنان: والله
ريم بأسلوب نغزات عشان ما تفهم ساره: أهيا قالتلج؟!
روان : إيــه , كانت تبي تسويها مفاجأه
ريم و تشققت من الوناسه: ههههه
روان و مستانسه على وناسة رفيجتها :.. عساها دوم هالضحكه ..
أسماء: إحم ما تستحون تغازلون بعض جدامنا؟, تفتحون عيونا على اشياء ما نعرفها ههه
ساره: إيه والله بروحنا أ ُطط (قطط) مغمضه
ريم: واااي الحره مالكم شغل ...

ريم تذكرت ام عزيز.. بحزن: بس أمهــاا شلون؟
روان : يحلها الحلال إنشالله

وصلت روان عند باب بيت ريم .. نزلوا البنات و يـت ساره قعدت جدام .... و خالد مازال لاحقهم!
ساره: روان
روان تلف تطالعها:.. همم
ساره: منو البنت اللي رحتي معاها؟!
روان : اي بنت
ساره: اللي مرتج نينو و طلعتي معاها
روان و تذكرت جذبت ريم: ايه . رفيجتي
ساره:منو هذي؟!
روان: وحده ما تعرفينها
ساره:شنو اللي بينج و بينها؟! شقالتلج عشان تقلب حالج جذي؟!
روان : واللي يرحم والديج ساره مالي خلق أتكلم ...
طولت على الأغنيه و حقرت إختها .. اللي زادت الشكوك براسها , مو مقتنعه من ولا كلمه سمعتها من ريم و روان ..

وصلوا بيتهم و نزلواا...
توهم بيدخلون البيت ... سمعوا هرن سياره
ساره: هههه خالد شكله لاحقنا
دشت روان البيت و سوت روحها ما شافت خالد ...
ساره: حياك خلوود تعال إقرب
خالد و معصب على روان! تحقرينيي أنـــا: هلا سويره... وين كنتوا رايحين ؟!
ساره و تغمزله: والله إنته لاحقنــا تدري وين رايحين هههه
خالد : بس أم إلسان طويل نادي أبوج و جاسم الدوانيه ...
ساره: تُــأمر سيادتك ...
راح خالد صوب باب الدوانيه ..
قبل ما يدخل سمع صوت روان تتكلم بالموبايل: شافني واقفه مع عزيز
خالد بهدوووء: فيها سليمان و عزيز و البقيه تأتي ....
روان لفـــت شافت خالد !
و ورااه جاســـــــــــــــــــــــــــم !!!!!!.......


...شنو موقف جاسم من اللي سمعه ؟!
و شنو اللي بيصير بريم و عبدالعزيز...
ترقبوا الجزء السادس ;)