●◦● ~ [ليــــت اللي باقـــي من عُمــري ويـــاك]~●◦●

●◦● الجزء الثاني ●◦●


عبدالعزيز: يُمــا يُمـــا
أم عبدالعزيز: هلا يما أنا بالصاله تعال
عبدالعزيز: صبحج الله بالخير يا ويه الخير , شلون الغاليه, و يبوس راسها
أم عبدالعزيز: شالحجي الحلو و اللسان اللي ينقط شيره من هالصبح
عبدالعزيز: إذا أم عزوز ما نقولها حجي حلو حق منو نقول
أم عبدالعزيز: والله على قعدتك الصبح و هالحجي الحلو وراك إنه
عبدالعزيز: هههه فاهمتني عدل
أم عبدالعزيز: قول شعندك
عبدالعزيز: منتي مريقتنــا أول , لاحقين علي عندي
أم عبدالعزيز: نريقك ليش ما نريقك , ...


عبدالعزيز: شلون خواتي ,شخبارهم
أم عبدالعزيز: والله مدام تبي تعرف أخبارهم دق عليهم شوف أخبارهم
عبدالعزيز: والله كل ما يت أبي أدق عليهم يكون الوقت عندهم ليل و ما أبي أخرعهم
أم عبدالعزيز: يا عزوز قلبي ماكلني عليهم, يعني الكويت ترسها جامعات لازم هالغربه
عبدالعزيز: رغبتهم يما ما نقدر نوقف بوي طموحهم ,
أم عبدالعزيز: بس والله هالسفر و هالغربه تعب عليهم و علي ! الليل ما أنامه من المحاتات بنات بروحهم و بغربه
عبدالعزيز: مو بروحهم معاهم ولد العم بعدين أهما ثنتين وحده تدير بالها عل ثانيه
أم عبدالعزيز: خل يخلص حمني هالصيفي و أنا رايحتلهم ماني قادره أصبر عنهم
عبدالعزيز: يما إذا مشتاقتلهم لهالدرجه , سافريلهم و بس يخلص حمين نلحقج أنا وياه
أم عبدالعزيز: حمني و أهوه تحت عيني زين يداوم ,, هالمره أسافر عنه لا بالله قوع بمواده و تنقع بالثنوي
عبدالعزيز: أنا بعرف على منو طالع جذي ما يحب الدراسه ماني عارف
أم عبدالعزيز : كل عيالي دريسين و يحبون العلم إلا هالمصعوي مادري شلون طلع
عبدالعزيز بصوت واطي : من دلالج
أم عبدالعزيز : إلا تعال ليش ما سافرت مع ربعك مو ماخذ إجازه من دوامك؟!
عبدالعزيز: لا بقطع الإجازه باجر و ببدي أداوم
ام عبدالعزيز:هو ليش منته مسافر معاهم , هونتوا عن السفره
عبدالعزيز: لا سافروا الربع
أم عبدالعزيز: و أنته ليش ما سافرت معاهم؟! ناقصك فلوس؟
عبدالعزيز و بدى يرقع حق روحه : لا الخير وايد مو ناقصني , بس قلت أخذ الإجازه عقب عشان اسافر معاكم حق البنات
أم عبدالعزيز: إييــي والله زين تسوي مشتاقيلك

عبدالعزيز: جم باقيلهم و يتخرجون ؟!
أم عبدالعزيز: منار باقيلها سنتين و منال باقيلها كورس واحد و ترجع
عبدالعزيز: الله يوفقهم إنشالله
أم عبدالعزيز: شنو الموضوع اللي كنت تبي تقولي ياه ؟
عبدالعزيز: مشالله عليج ما نسيتي
أم عبدالعزيز: عبالك خرفت ؟! الحمدالله بعز شبابي ذاكرتي أقوى من ذاكرة حميــن
عبدالرحمن: شفيــه هالحمين كلا حاطين عليه
عبدالعزيز: بسم الله الرحمن الرحيم أنته من وين طلعت
عبدالرحمن :صارلي ساعه منسدح بالصاله اللي يمكم أسمع سوالفكم, أنا مصعوي يمــا ؟!!!
أم عبدالعزيز: هااا ...لاا حبيبي انته مو مصعوي , ما رحت الثانويه !!!!!!
عبدالرحمن: شنو ما رحت الثانويه ما تشوفين الرمادي علي! امتحنت و رديت
عبدالعزيز: و شنو سويت بإمتحانك؟
عبدالرحمن : أمَشِي حالي
عبدالعزيز: شد حيلك إذا تبي تدش ..سعد العبدالله ..ترى يبون نسبه بعد
عبدالرحمن : لا معدلي يدخلني لا تحاتي
عبدالعزيز: يلا عيل يمـا أنا ماشي تامرين على شي
أم عبدالعزيز: و موضوعك؟!
عبدالعزيز: بعدين بعدين اقولج
عبدالرحمن: إذا تبيني اسكر أذوني عشان تقول موضوعك ما عندي مانع
عبدالعزيز: سكر عيونك بعد, يلا فمالله




وطلع عبدالعزيز من أمه و أخوه و اهوه كان على وشك أنه يفاتح أمه بموضوع ريم
مو قادر يصبر أكثر عن هالبنت يحبها بكل ما فيها بشطانتها بحنتها بأذيتها
أول مره بحياته تتحكم بنت بمشاعره بهالطريقه !





ريم: أستغفر الله استغفر الله الجو مو من صجه؟ الشمس تستهبل ؟!
روان : يعني أول مره تقعدين بالكويت شهر 8 أكيد حر
ريم : بس مو جذي , هالمره بزود فرن !
روان : ريوم عن التحلطم الزايد كل ما تحلطمتي زاد الحر
ريم: جيكي جيكي
روان: وين
ريم: اللي وراج أم أصفر
روان: شفيهــا؟
ريم : حلفـــــــي ما عرفتيهــا ؟!
روان: لا والله ما اعرفها
ريم: ما عرفتيها البطه أم خشم
روان: اي ام اصفر تتحجين عنها؟!
ريم: الل وراج ام شعر مصبوغ
روان: وين بطه , شحلات جسمها
ريــم: إيـــه هذي شيخه اللي كانت معانا بالمدخل ! مسويه 3 عمليات تجميل
روان : أأأأي شي , والله مو هينه صايره زوووغه
ريم: شفط و خشم و تفخ براطم
روان: بس وايد overبراطمها صايرين
ريم: إيه اللي شفطوه من كرشها كله حطوه ببراطمها غميضه يقطونه هههههه
روان: بس بس سكتي لا تسمعج
ريم: ويه خلتسمع شهامتني فيه
روان: تصدقين يبيلي اسويلي جم عمليه اضبط شكلي فيهم
ريم: مينونه انتي تحورفين بعمرج ما فيه شي شكلج
روان : وين مافيه شي طاعي خشمي شكبره !
ريم : ما عندج سالفه شحلاتج
روان : ريــــــوم سليمان يدق علي
ريم : ردي عليه شناطره
روان و مرتبكه مشتاقتله بس ما تبي تقط روحها عليه أكثر: ألو
سليمان: ألـــــو روينه
روان: هلا سليمان
سليمان: شالأزعاج اللي عندج ما أسمعج عدل
روان: أنا بالكفتيريا , دقيقه خل أطلع منها
و قامت روان طلعت من الكافتريا قامت تتمشي بممرات الكليه
روان: ألو سليمان جذي تسمعني عدل؟
سليمان: إيـــه جذي تمام , شدعوه مستخسره مسج فيني
روان: لااا والله بس قلت انه توك واصل من السفر يمكن تعبان
سليمان : صدقتج عاد
روان: والله سليمـــان





خالد : أقولك خلتني أطق درب لي الشاليه و أخر شي الشاليه مقفول و الحارس التبن مو موجود!
جراح: ههههههه والله زين تسوي فيك محد يعرفلك غير امك
خالد: خلصني أنته الحين قولي وينك
جراح: بالجامعه بعد وين لايعه جبدي من هالصيفي
خالد : عاد قايل ماني طاب الجامعه هالصيف بس شسوي ماني راد البيت ابي امي تحاتيني أكثر
جراح: خلصينا هند رستم بتيي الجامعه ؟
خالد : انا إنذليت بما فيه الكفايه اليوم !!!!
جراح: ما عاش اللي يذلك يبا ناطرك بالكافتيريا لا تطول
خالد : اففف زين يايك


خالد وصل الجامعه و بدا يتمشى بهالممرات يبي يروح الكافتيريا, لمح وحده واقفه تتحجى بالتلفون بروحها
و ما تدري عن الدنيا
قرب صوبها خالد و إلا تطلع روان بنت خالته ... اففففف اليوم هذي وراي وراي ماني مفتك منها
و قام يمشي بسرعه ما يبيها تشوفه و أهوه يمشي سمعها
روان : سلوووم يلا عاد متى ترجع والله إشتقتلك

خالد وقف الدم براسه !!!! بنت خالتي و قاعده تغازل بالتلفون و بالجامعه الرايح و الراد يسمعهــا !
إشتعلت الغيره بقلبه و وقف!
خالد و بصوت قوي : روان روان
روان و إرتبكت من الصوت لفت وإلا خالد , صكت الموبايل عقب ما سمعت شي قاله سليمان...: خـ خالد هلا والله
خالد: من كنتي تكلمين
روان: نعم؟!
خالد بعصبيه و بصوت أقوى: روان منو كنتي تكلمين؟!
روان و حدها خايفه لا يكون سمع شي : رفيجتي شفيك
خالد: رفيجتج إسمها سلووم؟
روان و قلبها طاح إبطنها : شنو شكو سلوم إسمها أسوور , و بعدين مو عيب واقف تكلمني جدام الرايح و الراد
و هدته و راحت ركض الكافتريا !

خالد بس وصل حده خاف يذبحها من الحره رد ركب سيارته و طار لي بيتهم !


روان و من الخرعه بغت تطيح على ويها كذا مره
ريم: شفيج شفيج سملله عليج
روان: خلود خلود سمعني و أنا أكلم سليمان
ريم : أي خلوود
روان: ولد خالتي نوريه
ريم : مو قلتي أنه مو ماخذ صيفي !
روان : إيي مو ماخذ بس مادري شايبه !!! امبيه ريوم خوفج يعلم جاسم !
ريم : انتي متأكده أنه سمعج؟
روان: أقولج قالي منو سلووم!!
ريم: ويــــــــــــــــــــــــــي !!!!
روان: أمبيه خايفه ريوم
ريم: ماكو شي إنشالله شرقعتيله شقلتي أنتي !





جراح: أيا التعبان صكيت جهازك ! هذا يزاي مطوف محاضره عشانك


خالد و اهوه دايس بسيارته مو عارف شسوي !
ين ينونه , شياطين الدنيا كلهم ركبوه مو عارف شلون بيتصرف !
وصل بيتهم و بنص الصاله: يُمــــــــــــا يُمــــــــــــــــــا
أم خالد: نعم ...شحقه راد , مفتاح الشاليه مو عندي لا تحاتي
خالد اي شاليه اللي لي خلقه الحين : لا يما مو ياي عشان الشاليه
ام خالد : شعندك شتبي عيل
خالد : بخطب روان !!!

ام خالد و أهيا مو مصدقه أذونها : و حجي الصبح؟!
خالد و أهوه مو عارف ليش قال جذي أصلا : فكرت بكلامج و ما راح ألقى أحسن منها !
أم خالد : شفت لي قتلكم محد يعرف مصلحتكم غيري و قامت تيبب الأم و راحت لمت ولدها
خالد و الشرار يتطاير من عيونه : يما ابيها اليوم قبل باجر
ام خالد : لا أصبر شوي خل يرجع ابوها من السفر عشان يقنعها
خالد: يقنعها ؟! ليش إنشالله مفكره ما توافق علي
أم خالد : أأأ انا كنت مفاتحتها بهالموضوع من قبل بس قالتلي انك حسبت أخوها
.....خالد و ووصل حده أكيد حسبت أخوها مدام هالسلووم عندها أنا أوريج ....
أم خالد : فرحتني يا وليدي والله أني أحاتي روان و ساره أكثر من ما أحاتيك أنته و أخوانك , من يوم توفت المرحومه
و أنا شايله همهم
....خالد أنا لازم أدق عليها و أوريها أنه ما عندها فرصه للرفض ! و إلا السالفه كلها عند جاسم ....
خالد : فمالله
أم خالد : تعال تعال يما على وين , أقعد تغدى معرسنا
خالد و طلع من دون ما يرد على أمه





روان بالسياره مع ريم و ميته بجي ,
ريم: حبيبتي رونه قطعتي روحج بجي ليما الحين أنتي مو عارفه شنو بيصير طولي بالج
روان: ريوم خالد ما راح يطوفها أعرفه والله
...روان و تفكر بسليمان اللي لما سمع خالد يناديها...
سليمان: هاا روون من ورانا عندج صاحب
روان !!!!! معتبرني شنو أنا! شنو بالنسبه حقه لهدرجه عادي عنده أكلم غيره و ردت بنوبة بجي
ريم : روان هدي نفسج شوي عشان تقدرين تفكرين , يا حبيبتي ما يسوى كل هالبجي
روان و اهيا تشاهق من البجي :مو فاهمه شي أنتي يا ريم مو فاهمه

[لبيـــه ياللي وحدك إن قلت لبيه يذبحني لبيهك و يذبحني الصوت]
ريم: روان موبايلج يرن شوفي منو
روان و من ورا دموعها قرت الرقم بس ما عرفته , حذفت الموبايل بالجنطه ولا ردت عليه
ريم: منو اللي داق
روان حاقره ريم و مسنده راسها على جامة السياره تفكر بردة فعل سليمان ! ما توقعت بيوم بيكون هذا كلامه توقعت كل شي إلا هالشي !
....صوت مسج...
ريم و خذت موبايل روان تشوف المسج بما إنه روان بعالم ثاني
" "ردي يا الشريفه أنا خالد ولد خالتج

شهقت ريـــم شهقه خرعت روان و سحبت الموبايل من إيد ريم
روان و زادت بجي : أمبيه ريوم خايفه والله خايفه
ريم: ما عليج لا تخافين لي دق ردي عليه ما عنده دليل أصلا خلج واثقه من نفسج
روان : ريوم سامعني بأذونه مو دليل كافي !
ريم: دليل كافي بالنسبه حقه بس ما يقدر يتهمج جدام أحد , لا تحاتين رون أنا معاج !

[لبيه يااللي وحدك إن قلت لبيه يذبحني لبيهك و يذبحني الصوت]
روان و بخوف: ألو
خالد : زين رديتي , نوعج سنعه ما تردين على أرقام غريبه!
روان: خالد شبغيت
خالد: أمي بتخطبج حقي و لي سألتج قولي موافقه
روان : شنـــــــــــــــــــــــــــــــــــو!!!!!!!!!
ريم : شنو شنو شقالج
خالد: و إن فكرتي إنج ما توافقين ! ترى طلعت برنت على رقم موبايلج
و أتوقع سليمان جاسم الــ...
بيخليج توافقين و إلا بتردين تجلطين أبوج مره ثانيه

روان ودارت فيها الدنيا ما قامت تسمع من الصدمه !!! حذفت الموبايل و قامت تبجي!
خالد سمع صوتها و أهيا تبجي و تأكد إنها على علاقه مو عاديه بسليمان !





لين: باباتي أنا أحبك أكثر من ماما
جاسم: يا روح أبوج أنتي , و أنا أموت فيج
لين: باباتي ابي اروح بحر
جاسم: نوديج البحر جم لين عندي أنا
حصه : أنجب الغدى جاسم
جاسم: دقي على روان شوفيها وينها تأخرت
حصه بصوت واطي :وينها يعد أكيد هايته
جاسم : شقلتي؟
حصه: أقول على أمرك

حصه و تدق على روان
ريم و انصدمت من الحجي اللي سمعته من روان و من ردة فعل خالد عل موقف اللي صار
ريم: صاحي هذا؟! شقصده من الحركه اللي سواها ؟!
روان و أهيا تجي: مادري مادري ريوم المشكله مطلع برنت عل رقمي و عادي عنده يوريه أبوي
ريم: هدي روان شوي خلينا نقدر نفكر

[لبيــه ياللي وحدك إن قلت لبيه يذبحني لبيهك و يذبحني الصوت]
ريم و تدور موبايل روان اللي طايح
روان : ريــــــــــوم سيــــــــــــــــــــــــــــــــــــــــــــــــ ـــاره!!!!!! !!!
ريم وحاولت تلف بسرعه عن السياره اللي جدامها بس
............طراااااااااااااااااااااااااااااخ...... .......
دعمت السياره !
ريم و روان ميتين من الخرعه !

إنزلت المره مع ولدها من السياره
...: حسبي الله عليج عميه عميه ما تشوفين
....: يما دبة سيارتج راحت فيها !!!
ريم نزلت من السياره: محد عمي غيرج , جذي أحد يطق بريك مدام عيوز شكو سايقه سياره
المره: أحترمي نفسج يا قليلة الأدب ماكو لا أخلاق ولا إحترام !
ريم: يا عمتي أنتي حركي حركي ,
المره : ما راح احرك إلا ليما إيون الشرطه , حمني دق عل المخفر خل يقطون هالهيلق بالنظاره
ريم: أقول حجيه أحترمي نفسج و ذلفي مالي خلقج ! عيوز النار
عبدالرحمن: إنتي هيه إحترمي نفسج طراق واحد افرلج ويهج
ريم: إنجـــــــب إنته بس !
و صارت هوشه بين ريم و عبدالرحمن و أمه



حصه: جاسم ما ترد إختك , ما أدري وينها و بصوت واطي هالصايعه
جاسم : خلاص نادي ساره و حطو الغدى
ساره: ما يحتاي لا تنادوني , يييت عل ريحه
لين: عميمه تعالــــــــــــــــي
ساره: لـيــــــــــــــــون حبيبتـــــي
جاسم : ههه شفيكم تصارخون على بعض
ساره و أهيا تبوس بنت أخوها: أحبها ياربي شسوي
حصه: ساره نزلي بنتي لو سمحتي , ما أحب أي أحد يشيلها
جاسم و تضايق من كلام مرته: الغدى حصه
ساره و تضحك على مرت أخوها : إلا جاسم متى بنسافر مشتاقه حق أبوي
جاسم: بس تخلص رون صيفيها نسافر , إلا تعالي وينها فيه مو المفروض راده من الساعه 1
ساره: يمكن عندها إمتحان و إلا شي لا تحاتيها ...


روان و تطلع راسها من الدريشه: ريم شفيكم فضحتونا
ريم: عيوز النار يبيلها تأديب قليلة الأدب سيارتها مافيها شي و تبي تنطر الشرطه
المره: محد عيوز النار غيرج يا المو متربيه
ريم : أنتي هيه لالا تقطين أذونج قطيعه , حووش
المره و يايه عند ريم : أنا حوش يا المو متربيه .. و يايه بتمد إيدها على ريم بس مسكها عبدالرحمن
عبدالرحمن: يمــا لا توصخين إيدج بناس زباله !
ريم : إنتا بابا لا تسوي روحك ريال على مخي , و تنقطع إيديج إن فكرتي تمدينها مره ثانيه
روان و عقب ما صدع راسها خلاص بتموت: ريوم تكفين بس دقي على واحد من إخوانج يتفاهم معاهم بموت من الحر
ريم : حبيبتي إنتي أسفه يلا كا ثواني


ريم : ألو محمد
محمد: شمسويه ريوم, ما تعرفيني إلا حزت المصايب
ريم: محمد سويت حادث وحده عيوز عميه طاقه بريك خلتني أدخل فيها
المره: عميه تعميج إنشالله
ريم: إنتي ما تستحين قاطه أذونج ؟! ذلفي ذلفج الله
محمد : وين مسويه الحادث خلصيني
ريم و قالت حق أخوها عن مكانها و ما مرت 5 دقايق إلا أهوه ياي و عطاها سيارته عشان توصل رفيجتها
ريم: تسلم أخوي حبيبي , تكفى حمود إذا عندك واسطه قط هالعيوز بحبس إنفرادي
محمد: هههههههه إستحي على ويهج مره كبر أمج
المره: هذي تعرف الحيا و إلا المستحى
ريم: أقول يا العصل أمسك أمك لا تقرب من أخوي , حمدالله والشكر تمشي و تتلصق
عبدالرحمن: أقول يا الأخو أدب أختك
محمد و أهوه حاقر عبدالرحمن و يروح يقعد بالسياره ناطر الشرطه



عبدالعزيز: خير يمــا شصاير
أم عبدالعزيز: وينك يا يمــا من مساع ندق عليك
عبدالعزيز: أسف والله ما كان فيه شحن خير شصاير فيكم
أم عبدالعزيز: دعمتني وحده قليلة أدب و ناطرين الشرطه
عبدالعزيز: لااااا عسى ما تعورتي؟
أم عبدالعزيز: لا الحمدالله ما فيني شي بس هالقليلة الأدب طولت إلسانها علي و قامت تبجي الأم
عبدالعزيز: يمااا يمااا قوليلي وينج منو معاج !!!
عبدالرحمن:ألو شقلت حق أمي بجيتها ؟!
عبدالعزيز: ما قتلها شي بروحها بجت ! وينكم حمين خل إييــكم








ريم: عزوز حبيبي مادريت شصار علي
عزيز: شفيج بعد أنتي شصار عليج؟
ريم: ليش منو غيري إنشالله صاير فيه شي
عزيز: يغارون الحلوين؟
ريم: عزيزان قول شصار علي
عزيز: شفيج حبيبتي شصار فيج؟
ريم: سويت حادث بغيت أموت
عزيز: سملله عليج بعد عمري , حتى أمي صارلها حادث اليوم
ريم: وي عسى ما صار شي بخالتي؟!
عزيز: خالتج؟!
ريم بخجل : أمك يعني خالتي
عزيز: أم ريلج يعني
ريم بخجل أكثر: عزيــــــــز يوز عني
عزيز: هههه يغارون و يستحون فديتهم أنا
ريم و بتغير السالفه من الخجل اللي سيطر عليها: قولي شلون أمك
عزيز: والله بخير مافيها شي سيارتها اللي شوي كلتها حرام عاد توها فاتحه اللكزس, بس حدهاااا منقهره
ريم و قاعده تفكر أنا بعد داعمه لكزس: بعد عمري خالتي شفيها منقهره , السياره بدالها ألف المهم أهيــا
عزيز: لا مو علسياره منقهره , منقهره من اللي داعمتها
ريم: ليش؟
عزيز: والله من كلام أمي وحده لو أشوفها جدامي أدوس إبطنها وقحه بشكل مو طبيعي اللي طولت إلسانها على أمي و قلة أدبها
والله لو إني هناك جان لتيتها طراق علمتها السنع بس اشوه انه حمين اللي معاها مو انا
ريم و بدت تشك بالموضوع : إلا أمك وين داعمه ؟!
عزيز: صوب المنطقه الحره
ريم و بس تأكدت من اللي قاعده تفكر فيه: أاا أها
عزيز: إلا تعالي أنتي ما قلتي منو داعمه؟
ريم : أنا أنا داعمه هندي راكب تنكر
عزيز: والله هالهنود ما يعرفون بالسواقه شي
ريم و قامت إدعي على روحها يعني ما تعرفين تقضبين إلسانج شوي: عزيزان حياتي أنا دايخه لي قعدت من النوم أكلمك
عزيز: نوم العوافي يا حلو , عاد حلمي فيني ما أوصيج
ريم و أهيا بالها مو معاه قاعده تفكر شلون تطلع روحها من هالسالفه: هه أكيد حبيبي أنته يلا باي
عزيز و مستغرب منها حدها طاخه وين لويتها : باي قلبي





:Dترقبوا الجزء اليديد و شنو التطورات اللي بتصير