●◦● ~ [ليــــت اللي باقـــي من عُمــري ويـــاك]~●◦●

●◦● الجزء الرابع ●◦●

في إحدى الشقق بإيرلندا..

محمد: أقولك ما قط شفت مثل هالجمــال أيه من الجمال , سبحان اللي خلقهـا
فراس: ههههه إنزين ما عرفت إسمها شي
محمد: أقولك تنحت تـتنيحه مو طبيعيه اللي إلساني إنربط ما عرفت أصفلي جم كلمه
فراس : لهدرجه يعني حلوه؟
محمد: أقولك تنحت !
فراس: يلا ما عليه تعيش و تتنح
محمد:تطنز حضرتك؟! يبا والله حلوه تطيح الطير من السمـا
فراس: ما نخلص الليله؟ يبــا نام باجر ورانا قعدنـا من الصبح
محمد: إيـــه حدا بقعد من الفير و ببسط بالكافيه اللي شفتها فيه
فراس:إيــه صير ناطور , إحنا بنطلع و نتمشى و إنته إنطرها هههه
محمد: ألقاها ألقاها !
فراس: إخمد حمود بسك قرقه





من الجانب الأخر من إيرلندا ...
منال : وااي الخايس عزوز يخطب و إحنــا مو معاه
منار: تخيلي يملج و يعرس و إحنــا ما رجعنــا , أذبحه والله
منال : تدرين قلت حق أمي لا يتم شي إلا لمـا نشوف البنيه
منار: إيه والله تخيلي ما تعجبنـا ويع شلون بتحمل جنه( مرت أخو) جيكره وإلا نفسيه
سلوى (رفيجتهم سعوديه و زميلتهم بالسكن) : أجــل بيعنس الرجال
منار : والله يعنس ما يعنس مو شغلي أنــا وحده ما أتحمل مرت أخو مليقه
سلوى: ههههه هذي و أهي ما جت , الله يعينها عليكم
منال و أهيا تفكر : تدرون منو بتكون خوش مره حق عزيز ؟!
منار و سلوى: منو؟
منال و بإبتسامـــه كبيره: سلــــــــــــــوى
سلوى و تضحك : و أهد الرياض؟!
منار : إيه صح تمام سلوووه عشان تصيرين معانا
منال: هـــا جني أشوف موافقه بويهج, واحلاتهــا إستحت ويهــا حمر
سلوى : أقول إنكتمي يا هبله ,والله لو تسمعك أمي تقتلك
منال: شتبين إنتي وافقي و خلي أمج علينا
منار و تضحك على خبال إختهــا : إيــه سلووه وناسه والله ماراح تفتكين منا تصيرين مرت أخونا
سلوى و تقوم من الصاله تدخل دارها: أنا داخله أنــام , أفتحوا هالسالفه معاي بكره بشيل قشي و أروح أسكن مع بنات ثانيين
منال و منار يضحكون على صديقتهم اللي كانت لهم أكثر من إخت مو متخيلين حياتهم من دونهــا ,





روان بعد ما قعدت من النوم و حاسه راسهــا ثقيل , خذت موبايلهـا لقت 20

miss call
وكلهم من ريم
روان : خير إنشالله شفيهــا .... دقت على ريم و كانت الساعه 10 الصبح
ريم : ألــــــو روون وينج ؟!
روان و مخترعه: شنو شفيج؟!
ريم و صوتها مخنوق : روون عزيز طلع يلعب علي
روان : شنــــو؟!
ريم و قالت حق روان سالفة اللي تقدملهـا ,و عزيز رد عليها ببرود غير مبرر
روان و تذكرت سليمان و خالد : لا حول الله , شالحظ الفقر أنـا وياج
ريم: والله روون بموت ما أتخيل حياتي بدونه
روان و حابسه دموعهـا : يعوضج الله باللي أحسن منه إنشالله .لا تبجين ريوم مو أخر ريال بالدنيا أهوه
.... روان تفكر انا بس فالحه انصح !...
ريم: روون والله خايفه لا يكون بسبة أمس ,المرا اللي دعمناها طلعت أمـــه
روان و منصدمه ألف فكره يت إبالهــا : ريوووم أهوه يكلمج عادي ؟! يابلج طاري إنج داعمه أمه؟!
ريم و بدت تهدى: لأ ولما سألني شنو السياره اللي داعمتها قصيت عليه
روان: ما أتوقع عيل عارف إنج داعمه أمه , أصلا سيارتج بإسم أمج ! و أخوج اللي كان هناك مو أنتي ! ما أظن ريوم
ريم : عيـــل ليش ما يبيني , رووون والله كان ملمحلي إنه بيخطبني ! و كان يعصب كل ما خطبني واحد الحين عادي عنده
روان : ريم , يمكن عشان متأكد إنج بتردين اللي متقدملج, يمكن مسوي إختبار يشوفج تبينه حتى و أهوه ما يبيج! لا تستبقين الأحداث ريم !
ريم و حست أنه كلام رفيجتها مقنع: إيـه والله تصدقين , عاد نظامه إختبارات و يشوف شكثر أحبه
روان و إرتاحت عشان قدرت تهدي رفيجتها : و أنتي على طول ما يبيج , يحليله هالحلي يحصله وحده حلوه تحبه مثل الريم
ريم بغرور: إيــه والله , إلا تعالي شنو توج تقولين حظنا فقر؟!
روان و تنهدت من قلب:.....
ريم : سملله عليج شفيج؟! عسى ما شر؟! سوا شي خالد؟!
روان و بألم تتكلم : أمس رديت البيت لقيته بالبيت مع جاسم ! و قال يبيني بموضوع طلع جاسم و قالي موضوعه !
يا ليتنـــي ما رديت البيت !
ريم : شقالج شنو الموضوع اللي قالج ياه؟!
روان و حابسه دموعها اللي تنهمر غصبا عنهـا :
يقولي أنـا بتقدملج الحين و أنتي بتوافقين بس يوصل أبوج !
و الجامعه بتطلعين منهـا , جدام أهلج و الناس تقولين إنج موقفه قيدج سنـه و عقب لي خذيتج تطلعين من الجامعه
, الحجاب بتلبسينه , نقطة مكياج ما أبي أشوف على ويهج حتى بليلة عرسج!
طلعه مع رفيجاتج أختج بنات عمج ماكو, سويج سيارتج تنسينه !
موبايلج بس يرجع أبوج باخذه منج ! ....
إيــه و على فكره بس أخذج بسكنج بملحق بالأحمدي(منطقه بعيده بالكويت,) و محد بيطل عليج ولا يزورج حتى أبوج !
و أبي منج تفكرين تناقشيني بنقطه من اللي قتلج عليهم ....
ريــم : شنو يحلم هذا قوليله اللي ما تطوله بيدك واصله بريولك , شنو عباله ما وراج والي و إلا أهل يسألون عنج !
روان و تبجي بحرقه: رووون يقولي بيفضحني عند أبوي متخيله أطيح من عين أبوي, ريم أبوي من توفت امي و اهوه صايرلي أمي و أابوي و اختي و اخوي ! متخيله اخذله متخيله أخليه يندم عل وقته اللي ضيعه علينا و أهمل روحه و صحته و نفسه ! ريم أبوي حتى ما فكر يتزوج وحده ثانيه عشان ما تعذبنـا !!
ريم:روون أصلا أبوج ماراح يوافق حتى لو أنتي وافقتي!
روان: قتله والله قتله , قالي مالج شغل أنا مضبط كل شي !
ريم و بعدم حيله: إنزين قلتي حق سليمــان
روان واللي كانت واعده نفسها ما تذرف عليه دمعه ثانيه ..بجـــت بحرقة قلب: يقولي إنسيني ! إحنـا بس فريند !
ريم و منصدمه من الحجي وما حبت تزيد رفيجتهـا : حقير , إفتكيتي منه !
روان:ريوم متى أخر إمتحان عندنـا؟!
ريم: عقب باجر ,
روان و بدمعه : أخر إمتحان بحياتي بيكون, حلمي إني أتخرج من علوم سياسيه ! شكلي هدمته بيدي على شخص ما يسوى !
ريم و حاسه بألم رفيجتهــا : حسبي الله عليه , عساه يلقاها بأهله ! لا تفكرين فيه روان , و إنشالله الله يهديلج خالد و تنحل السالفه
روان بغصه : أمين

سكروا من بعض و ضلت روان تفكر بهمها!


روان و تتذكر اليوم اللي تعرفت فيه على سليمــان
كانت برابعه ثانوي , مسافره مع ابوها و اختها بعطلة الربيع
كانوا مسافرين (فينــا) مع قروب كويتين
و كان سليمان مع ربعه بهالقروب ....
بكل رحله بكل طلعه بكل وقت , كانت تشوفه جدامها
حبت شهامته بحكم إنه جاسم ما كان معاهم و أبوها كبير بالسن , كان يساعدها أهيا و ساره بكل شي من الجناط و الحجوزات و كل شي
بدون ما يحاول أنه يكلمها كان يكلم بس أبوها , و يعطيها نظره حب حسستهـا أنها عايشه بهالدنيا,
عكس ربعه ,عكس كل الشباب اللي كانوا معاهم بالقروب ,
كان محترم معاها ما شافته يتحرش إبــ بنت , كان جنتل بمعني الكلمه !
لين يا اليوم اللي بيردون الديره بالمطار و أهوه يأكد على حجزه و حجز عايلة بوجاسم !
تقدم من روان اللي كانت واقفه بروحهــا
سليمان: السلام عليكم أختي,وين الوالد
روان بفرحـه محد يتخيلهـا : وعليكم السلام , راح مع إختي و الحين راجع إنشالله , أمر بغيت شي؟
سليمان: لا بس حبيت أقوله إنه كل شي تمام و الجناط دخلناهم
روان بخجل: ما تقصر والله ,أسفين أزعجناك معانا
سليمان : لا شدعوه حاضرين للطيبين , ممم ما عليه روان أوقف معاج على ما يرجع الوالد , الصراحه مو حاب أشوفج واقفه بروحج خصوصا المطار متروس عرب !
روان و حست بغيرته عليها : ما تقصر شكرا
سليمــان : ممم أنتي روان صح ؟! و إختج ساره
روان :إيه أنا روان
سليمان: معاج سليمان الــ"....."
روان: و النعم
سليمان : أأأ روان إذا ما فيها إزعاج الصراحه مستحي مو عارف شلون أفتح الموضوع بس مضطر أقوله و ما ابيج تفهميني غلط!
روان : خير عسى ماشر؟
سليمان: والله أنا خجول بطبعي و ما اعبر عن اللي احس فيه , بس هممم الصراحه روان انا انسان ارتحتلج وايد و ما ابي افقدج فـ إذا ممكن أعطيج رقمي أو إيميلي لأني والله ما ابي افقد إنسانه مثلج !
روان و إنصدمت من طلبه: أا والله مادري شقولك يا سليمان صعبه وايد
سليمـان : روان ما أطلب منج شي ! بس فريند بس فريند ! و عطاها ورقه فيها رقمه و موبايله ! لي حسيتي إنج مستعده تكلميني تأكدي إني ناطرج!
شاف أبوها ياي من بعيد راحله سلم عليه و عينه ما إنزلت عن روان .. و إبتعد راح عند ربعه
روان حست أنها أسعد إنسانه بهالدنيا , حست انه الدنيا اضحكتلهــا من بعد موتت أمها !
...
اللي ما تعرفه انه لما سليمان رجع عند ربعه
واحد من الشباب: هــا شصار عليك بشر؟!
سليمان و بضحكه كبيره: يلاا يا جماعه كل واحد على 100 دينار البنيه خذت الرقم !
واحد من الشباب: طيحهــا السلم موهين زقمبي ,ولا بنيه سالمه منك لا بالكويت ولا بره
سليمان: إذكر ربك مع الويه تقطع حظي؟! يلا الفلوس بسرعه , عشان تعرفون تتراهنون معاي على وحده!
واحد من الشباب: بس والله مبين عليها تكانه شلون طيحتها مادري !
و قاموا يضحكون الشباب

حصه و تكلم أمها بالتلفون
حصه:وشلون خواتي مستانسين كلكم؟!
أم حصه: والله يا حصيص اللمه حلوه و الشاليه صاير شحلوه عقب ما سنعه ابوج, تعالي مري علينا أنتي و جاسم
حصه و حاسه بحره بقلبها من ريلها:مشغول يما ما يقدر
ام حصه و مستغربه من رفض بنتها : خلاص اخوج يمرج أنتي و بنتج
حصه و بتردد: لاااا لاااا يما انا اشوف جاسم و أردلج خبر,يلا يما اخليج مشغوله الحين
ام حصه: يلا بحفظ الله
و سكرت من أمها
حصه و اهيا تفكر

أه يا جاسم كل مالك و تحسسني بالنقص ! كل مالك و تحسسني إني أقل من الكل!
خواتي أعلى شهادات عندهم ! أحسن حياة عايشينها طلعات و سفر و وناسه و لبس!
و انا حاكرني بين اربع طوف محرم علي الطلعه محرم علي الحياة كل شي علي حرام و على خواتك حلال !
تعبت والله من هالعيشه محرم علي حتى قربك ! ليش خذيتني إذا لهدرجه بتعذبني ....


قبل اربع سنين
كانت حصه بنيه ذات جمال خليجي بارز , شعر اسود طويل , سمار يجذب , عيون مرسومه مكحله ,
طالبه بالثانويه تلفت كل عين تطالعها , رفيجة ريم و روان بالثانوي
كانوا من اقرب الرفيجات لبعض !
طلعات ,دراسه,حفلات , كانوا من أكثر البنات حياة إجتماعيه
بيوم من الأيام و بالهده ( إنتهاء الدوام المدرسي) و كانوا في الصف الرابع الثانوي

واقفين روان و ريم و حصه عند باب المدرسه ينطرون أهلهم ياخذونهم
حصه: إيــه عاد اقولكم انا الشهر الياي الليسن بيدي ,ماكو نطره عند باب الثانويه
روان: أيـــــــوا ايوا حصوه , اشكره بتقزيزينــا عدل
ريم :عاد حصوص ما اوصيج قولي حق ابوج يشترلج سياره سنعه
حصه: لاااا تحاتون من هالناحية , كايـــن بيبلي لا و قتله أبيه تيربو
روان: هههه تيربو عاد لا بالله دخلتينا بشبه
ريم: روووون جنها سيارة ابوج اللي هناك؟!
روان : إيــــه جسوم يايني فيها , يلا باي صبايا
راحت روان ركبت بالسياره مع جاسم أخوها ,
روان: وااااي إرحم أذونك قصر عل أغاني شدعوه
جاسم يغني بصوت عالي : منتتتتتتتتتتتتتتت رايق فيـــــــــــــك شي و متضايق
روان : إيه والله فيك شي
جاسم : منو هاللي واقفه معاهم ؟!
روان : منو بعد حصوه و ريوم
جاسم: ريوم شبعان من خلقتها , السمره الحلوه اللي معاها منو؟!
روان : إيــه شعبالك انا ما ارافج إلا حلوات, هذي حصيص هانم
جاسم : اهااا, ايه صج ترى زرعتيني سنه انطرج ! من اليوم و رايح ابيج اول وحده تطلعين من باب الثانويه
روان: افففف لا تحاتي كلها شهر و حصوه بـِطلع ليسن , و استغني عن خدماتك
جاسم : ليش جم عمرها؟!
روان: كبرنا بس اكبر مني بــ 5 أشهر
جاسم و طول على الأغاني و سرح بتفكيره
جاسم كان شاب طايش توه متخرج من كلية الهندسه و البترول , مقدم على وظيفه بشركة النفط
أغلب البنات كانوا متيمين فيه البنات اللي مع روان بالمدرسه يتعرفون عليها عشان اخوها
, جميل و ذو صوت حلو يغني بجلسات

جاسم بمجرد وصوله البيت صعد غرفته و قعد يفكر بهالبنت القمر اللي خذت عقله
والله هالبنت زوااج , خل اشتغل و اكلم روون تقولها ابيها
أم جاسم (الله يرحمها) متسنده على باب دار جاسم: حبيبي ما يبي يتغدى؟!
جاسم : هاا لا يما شبعان
ام جاسم : و شفيك سرحان؟!
جاسم : افكر بموضوع
دخلت ام جاسم الدار و قعدت قبال ولدها: شتفكر فيه؟ الوظيفه لا تحاتيها حاجيت خالك و قالي عل سبوع الياي بتشتغل
جاسم و الإبتسامه شاقه ويهه : حلفــــــــــــــــــــي ! الله يبشرج بالخير
ام جاسم : إيه يلا شد حيلك خل أزوجك
جاسم و تنهد من قلبه:....
ام جاسم : ويه ويه شكله السرحان مساع مو عشان الوظيفه
جاسم و مو عارف شلون يفاتح امه: اممم يما تعرفين حصه رفيجة رواان
ام جاسم : هههه إيــه شفيها
جاسم : خلاص ولا شي
ام جاسم : ههههه حبيبي انته قولي يما شفيها؟!
جاسم: مادري شفتها اليوم مع روان , و عجبتني
ام جاسم : هههههههه حلاته المستحي , ولا يهمك يما مدام دشت خاطرك,و يحليلها خوش بنيه , بس تخلص الثانويه نخطبلك ياها حلو؟!
جاسم و حس انه كل شي صار بسرعه: ههه تسوين خير يمـا فيني !

بس ما كملت ام جاسم رغبتهــا في أقل من سبوع توفت ام جاسم بحادث سياره ,قبل ما تزوج جاسم.. الموت كان أسرع من انها تفرح بولدهـا!

جاسم حاشته كأبــه مو طبيعيه , كان قريب من أمه بشكل غريب كانت صديقه له اكثر من ما تكون له مجرد ام !

عقب أشهر قليله من وفاة امه , حاول جاسم انه يطلع اهله من حالة الحزن اللي عايشين فيهـا , و حب ياخذ البنت اللي امه وافقت عليها!
تقدم حق حصه , و وافقت حصه كانت بطبعها تحب تكون محط انظار كلام البنات ! جاسم مهندس و جميل و الكل ميت عليه و بتتزوج قبل خواتها الكبار كلهم!
كان سبب مقنع لها انها توافق كان سبب كافي انها تتزوج جاسم و اهيا ليما الحينها طالبه!

روان كانت معصبه على قرار اخوها انه يتزوج و امها ليما الحين ما صارلها جم شهر متوفيه !
حقدت اكثر على حصه كانت تعتقد انها صديقتها المقربه توقعتها ترفض !
بس غرورها على البنات كان أكبر من انها تحترم مشاعر رفيجتها .....

تم العرس و كان بعطلة الربيع , حفله محفوفه بين الأهل و صديقات حصه ...
روان و ساره حضروا العرس مغصوبين !

من بعد زواجهم , صدم جاسم حصه واايــــد
توقعته شي و تفاجــأت فيه شي ثاني
تغير وايد من وفاة امه! تدين لحيته خلاها تطول , جمال ملامحه اختفى
صار كل شي عنده حرام و ممنوع!
الثانويه طلعها منها! لبسها الحجاب ...
ما قدرت تشتكي ولا تعترض !
و اهيا اللي عارضت امها و ابوها و وقفت بويهم و قالت ابيه
شلون تقدر انها تشتكي و تحسس خواتها و رفيجاتها انها مو متهنيه معا ريلها اللي كل البنات حسدوها عليه لما خطبها
شلون ما راح تقدر تحرهم !
حاولت انها تقص على روحها و تحمل بسرعه ! تعذرت بالحمل انها ما تقدر تكمل دراسه!
تحجبت لأني إنسانه متزوجه و ريلي يغار علي .... أعذار عطتها حق نفسها عشان ما تحسس نفسها بفشل اختيارهـا !


تنهدت حصه على هالذكريات , تنهدت على شبابها اللي ضاع , تنهدت على حلم حياتها انها تصير محاميه !
مسحت دمعه حاره من على خدها و راحت تسوي الغدى ....
.
.
خالد بالسياره و رايح طريج الشاليه
خالد: اقولج كلمتها و وافقت , بس بننطر بو جاسم يرجع و روحي خطبيها
ام خالد و مو مصدقه اللي تسمعه: شلون اقنعتها , انا كل ما خطبتك لها تقولي انته حسبت اخوها
خالد و يطق عل سكان بعصبيه : يمـــــــا ما نخلص يعني خلاص البنت وافقت ننطر ابوها و يتم كل شي !
ام خالد : هو هو شفيك شبيت جذي علي ! خلاص بالمبارك عليك
خالد: بس يوصل بو جاسم دقي علي تلفون عشان ارجع الديره,!
ام خالد : ما تشبع من الشاليه انته !
خالد و متنرفز: مع السلامه

سكره من امه و اهوه باله مع هالروان !مو قادر يشيلها من تفكيره !
عنده اهون عليه يذبحها ولا يشوفها يوم واحد تعيش و واحد غريب ساكن بقلبها
إحرقــــت اعصابه و قلبه !
خالد ياما سمع امه تكلم ابوه انها تبي تخطب روان حق خالد بس اهيا ترده ! حسبت اخوهـــا !

صعبه اللي يملك قلب مثل قلب خالد يتحمل هالصدمه! و أهيا اللي كان يعتبرها حب الطفوله , كبر و اهيا معاه
كل ايام حياته كانت بقرب روان ! كان يحبها من كل قلبه
حتى دراسته شد حيله بأخر سنه بالثانويه بس عشان يدخل نفس الكليه اللي بتدشها و يكون قريب منها !
حاول ينساها او يتناساها ,عقب ما عرف انها ما تفكر فيه!
بس لأ و ألف لأ ما راح يخلي واحد غيره يتهني فيهــا !
حتى لو ما تحبه و تحب غيره!
مستعد يعذبها! يذبحها! يموتها و يموت وراها
بس ما تكون بحضن ريال غيره!
ما تكون زوجـــة أحد غير خالد!!!
وصل ملجــأه الأمن اللي كان ينسى فيه طيف روان, ينسى ضحكتها, نعومة صوتهــا, و غروروها
!





أحدى الصباحات المشمسه بالكويت
في مكتبة جامعة الكويت بـ شويخ
ريم و روان قاعدين يدرسون حق أخر إمتحان عندهم بهالصيف
روان: خايفه ريم احس مو دارسه
ريم : ما عليج إنشالله خير, أهوه من كثر ما انتي دارسه تحسين جذي !
روان: الله يستر , عطيني نوتج ابي اخر شي فيها
ريم : هاج
و كملوا دراســـه ....


بقاعة الإمتحــان
روان سرحت بتفكيرها , هذا أخر إمتحان لي؟! هذي أخر قاعه امتحن فيها؟!
هذا أخر دكتور بيراقب علي؟! هذي اخر ماده أدرسها
نزلت دموعها على خدها , ليش ضيعتي كل شي بيديج!
ليش غبائج وصلج لهلمرحله!...يا رب إنك تسخرلي خالد و تخليه يشيل فكرة الزواج من باله!

الدكتور و يقترب من روان بصوت واطي: عسى ماشر روان تعبانه؟!
روان: هــ ها لا دكتور ماكو شي قاعده افكر بالسؤال
الدكتور : اللي ما تعرفينه تركيه و حلي اللي بعده ... و إبتعد الدكتور عن روان
روان ... ليتني اقدر اتقاضى عن الشي الصعب! مو بيدي الإختيار مو بيدي ....
حلت اللإمتحان بصعوبه! الأسأله كانت سهله و عارفتهم , بس المشاعر اللي إجتاحتها حزتها كانت صعبه عليها اقوى من إنها تتحملهــا !

طلعت روان من القاعه تاركــه وراها كم كبير من الذكريات الصعبه في هالجامعه! حبتها رغم صعوبتها
الأيام المره و الدراسه المتعبه تهون عليها جدام اللي تحس فيه!
كل تعبي بيضيع , ما جني سهرت ما جني ضيعت أيام من عمري ....
الله بيعاقبني على علاقتي بسليمان! أكيد هذا عقاب من الله !

روان بهالفتره صارت تراقب حياتها من بعيد ! كل شي تحس انها بتفقده قاعده تحاول تحفظه بذاكرتها تحاول انها تيمع اكبر قدر من الذكريات عن حياتها السعيده...

ريم تتكلم بصوت عالي قطعت سرحان روان : يا النحيسه نطريني على طول رحتي السياره
روان: هـ ها؟!
ريم : ويـــــــــي وين وصلتي . واي و اخيرا بودع الصيفي
روان بأسى : أنا قاعده اودع دنيتي
ريم و بضيقة حال على رفيجتها بس حبت تطلعها من المود اللي اهيا فيه : روووون شرايج نطلع طلعة بنات و نوسع صدورنــا
روان تتنهد:...
ريم: حبيبتي روان عيشي يومج و خلي كل شي على ربج, ما تدرين الله باجر شنو خاشلج ...
روان تفكر بالأشياء اللي راح تفقدهـا لو خذت خالد : أنــا بسوق
ريم و بإبتسامه: يبـــــا سوقي , خلاص خل ادق على اسوم و فروح و أنتي دقي على ساروه ! من زمان مو طالعين قروب
روان: خلاص انا اروح اييـــب ساروه و أمركم بيتكم
ركبوا سياراتهم و إبتعدوا عن الجامعه


روان بالسياره ... عمري ما فكرت أدوس كله اخاف من السرعه , خالد بيحرمني من السواقه
لا شعوريـــا قامت تدوس ... و تدووووووووس!
120 ...140...160...
حست روحهــا تطير
فجت شباصتهــا , كلا ما أحب افل شعري .. فلت شعرها فجت الدرايش
هواا قوي يطير شعرهـــا العسلي الفاتح على ويهـــا !
ما ودها ترجع البيت ! تبي تبتعد عن هالدنيـــــا ....
تطول على صوت المسجل

[....عرفت الناس و الدنيا و طريقي
عرفت أنه الهوى كذب و أماني
خذاني الشوق و الحب الحقيقي
لذاك اللي عقب وده نساني
نساني للأسف في عز ضيقي
و أنا في غمرة جراحي أعاني
لقيته في هوى غيري غريقي
تنكر من هواي و من حناني....]

وقفت روان سواقه , وقفت حالة الينون!
سفطت على اليمين بالهاي وي!
تشوف حالتها بالمنظره , شعرها على ويههــا مكياجها مخترب,
تتلفت على السيارات ! ماتدري وين وصلت كل اللي تعرفه انها كانت تبي تدوس تبي تطير عن هالدنيــا ! تبي تبتعد!
مسكت كلنكس مسحت ويهها بقوه تمسح دموعها اللي تختلط مع الكحل !
تمسح أثار جريمتها! تمسح كل شي من الممكن انه يذكرهــا بماضيهـا !

إنسيني ! بنساك لا تحاتي , ببدي دنيــا يديده! الله عاقبني فيك , خالد اهوه عقابي!
ربطت شعرها تخجل تفله , تستحي لما الناس تبدي اعجاب بجمالهــا ,....
حركت السياره , ساقت برزانتها المعهوده ...
رويشد من زمان ما سمعتله ! من لما قالي سليمان ما أحب أسمعلـــه !
حرمتني حتى من أبسط حقوقي , سلبتني حريتي !
طلعت cd
محتفظه فيه من مده ....
"رايح و راح أترك الدنيا وراي ...
لا الأرض هذي أرضي
ولا السما هذي سمااي "


تنهدت من قلبها, إتصلت على ساره
ساره: هلااااااو هلاااو باللي توها تذكر عندها إخت , ها بشري شهببتي ؟!
روان و تحاول تتصنع الوناسه: فيج طلعـــــه؟!
ساره: إيـــــــــــــــــــــــــــــــــــــه واللي يرحملج والديج! منحكره بالبيت بموت
روان : خلاص عندج 5 دقايق و امرج بنطلع انا و انتي و ريم و خواتها
ساره و بوناسه : يلاا أوكي باي

روان .. بفقد فصلتج سارون , بفقد سعادتي بقربج! كافي اني كل ما شفتج اتذكر امي!
أه يا يمـا ضعت من بعدج! وينج عني وينج... جان ما انحطيت بهالموقف وينج يا يمـــا ....


وصلت روان عند باب بيتهم , تنطر ساره تطلع ...
وقفت سيارة خالد جدام بيتهم!!!! معاه جاسم معــاه بو جاسم !
روان لا شعوريــا إنزلت ركض من السياره راحت حق ابوها.. تلمه تحضنــه بقوه! تبجي بحرقــه!!!
روان: الحمدالله على السلامه! والله الدنيا ما تسوى من غيرك
بو جاسم و بحنان أبوي غير عادي يحظن روان حيــــل و يبوسها على راسهـا : ههه مشتاقتلي وايد جنج؟!
روان تبجي أكثر تبجي بصوت عالي تشاهـــق و تحظن أبوهــا ,بصوت مبحوح : لا تخليني مره ثانيه يبــا

خالد تضايق من منظرها و اهيا تبجي تقطع القلب ! كل شهقه منها طعنه بقلبه!
لهدرجه ما تبني لهدرجه هالسليمان مسيطر على قلبج!

جاسم : روان بس عاد دشي داخـــل فضحتينا بالشارع

دخلت روان البيت و أهيا حاضنه أبوها بقوه , تناست وجود خالد اللي ما نطق بولا كلمه من شاف روان تبجي
ساره تنقز من على الدري : خلـــــــــــــصت
سكتت شوي و شافت أبوهـــا : يُبـــــــــــــــــــــــــــــــــــــــــــــــ ـــــــــــا
و راحت ركض دزت روان ولمت ابوها : حبيبي يبا والله اشتقلتك
بوجاسم: ههه خلوني اقعد يا بنات
قعد بو جاسم يمه بناته كل وحده حاظنته من صوب, راح جاسم ينادي حصه تسلم على عمها...

خالد : الحمدالله على سلامتك عمي...
إلتفتت روان عليــه , تذكرت كلامه! بس يرجع ابوج من السفر كل شي راح يتم!!
روان زادت بجي و حظنت أبوها بقوه أكبر ...
.ما تبي تفقد قربه حضنه حنانه! و ما تبي بنفس الوقت تخليه يغير نظرته فيها تخيب رجا أبوها! تحسسه انها ما قدر يربيهم!


...نهاية الجزء الرابع...
:D

إنشالله الأحداث اللي بالقصه إعجبتكم ,
شنو التطورات الل راح تصير ...
شنو اللي بيصير مع روان و خالد !